UNDP: Lufta e ka kthyer Gazën në vitet ’50

Lufta gjenocidiale e Izraelit në Gaza ka shkatërruar ekonominë palestineze dhe e ka lënë pothuajse gjysmën e popullsisë prej 2.3 milionë banorësh të Gazës në varfëri. Treguesit e cilësisë së jetës si shëndetësia dhe arsimi janë kthyer 70 vjet prapa, tha Agjencia e Kombeve të Bashkuara për Zhvillim (UNPD).

Duke nisur një studim mbi ndikimet socio-ekonomike të luftës, Chitose Noguchi nga UNDP tha se ekonomia në territoret palestineze – Rripi i Gazës dhe Bregu i pushtuar Perëndimor – tani ishte 35 për qind më e vogël sesa ishte para nisjes së gjenocidit izraelit në Gazë një vit më parë.

Sipas disa masave, niveli i varfërisë në Gazë tani po i afrohet 100 përqindëshit për shkak të bllokadës së vazhdueshme izraelite, me nivelin e papunësisë që tani ka arritur në 80 për qind, tha Noguchi.

“Shteti i Palestinës po përjeton nivele të paprecedenta të kthimit prapa”, tha ajo gjatë një konference për media në Gjenevë.

“Sa i përket Gazës, vlerësohet se zhvillimi është kthyer prapa për 70 vjet apo në vitin 1955”, shtoi ajo.

Edhe nën kushte optimale, nëse ndihma ndërkombëtare që dërgohet në Gazë dhe Bregun Perëndimor mbetet në nivele aktuale, do të duhet të paktën një dekadë që ekonomia të rimëkëmbet në nivelin e paraluftës, tha ajo.

Afër 3.3 milionë palestinezë – 2.3 milionë në Gazë dhe 1.5 milion nga ta fëmijë – kanë nevojë për ndihmë urgjente, vlerëson OKB-ja.

Kostoja e riparimit të dëmeve në infrastrukturë pritet të arrijë në vlerën prej 18.5 miliardë dollarësh.