Ukraina zbulon plan ambicioz prej 1 trilion dollarësh për rindërtimin afatgjatë

Kryeministri ukrainas Denys Shmyhal prezantoi sot një plan ambicioz rindërtimi prej 1 trilion dollarësh gjatë takimit ministror të Platformës së Donatorëve të Ukrainës në Konferencën e Rimëkëmbjes së Ukrainës 2025 në Romë, transmeton Anadolu.

Plani parasheh dy fonde të mëdha për të rindërtuar vendin gjatë 14 viteve dhe bëri thirrje për një angazhim të fortë të BE-së për të bashkëfinancuar mbrojtjen e Ukrainës.

“I pari është ‘Fondi i Ukrainës’ me 540 miliardë dollarë, që do të financohet përmes aseteve të konfiskuara ruse dhe një takse të veçantë mbi eksportet e lëndëve të para ruse”, tha Shmyhal në Telegram.

Ai tha se shtylla e dytë – një Fond Strukturor Evropian prej 460 miliardë dollarësh – do të projektohej për të kanalizuar investimet private të BE-së në sektorët e prodhimit të Ukrainës.

Shmyhal theksoi se ruajtja e presionit të sanksioneve mbi Rusinë dhe sigurimi i mbështetjes së qëndrueshme financiare mbeten prioritetet kryesore strategjike të Ukrainës.

“Falë punës së përbashkët dhe të koordinuar, ne kemi kapërcyer shumicën e sfidave financiare”, tha ai, duke theksuar nisjen me sukses të mekanizmit financiar ERA dhe ndihmën e vazhdueshme të mbështetur nga FMN-ja.

Ai gjithashtu propozoi që shtetet anëtare të BE-së të bashkëfinancojnë ushtrinë e Ukrainës, duke vlerësuar kostot e ardhshme të mbrojtjes në kohë paqeje në 50 miliardë euro në vit, gjysmën e të cilave Kievi shpreson që të mbulohen nga Brukseli. “Një Ukrainë e fortë do të thotë një Evropë e sigurt”, shtoi ai.

Në një deklaratë të veçantë, Shmyhal konfirmoi se Ukraina ka marrë një këst të ri prej 1 miliard eurosh ndihmë makrofinanciare nga partnerët e G7-s, të financuar përmes fitimeve të gjeneruara nga asetet e ngrira të bankës qendrore ruse.

Shmyhal e përshëndeti këtë veprim si “drejtësi në veprim” dhe përsëriti thirrjen e tij për konfiskimin e plotë të aseteve ruse.