U vendos nën sanksione nga SHBA, gjiganti rus i naftës, Lukoil shet asetet ndërkombëtare të kompanisë
Gjigandi rus i naftës Lukoil ka njoftuar se do t’ia shesë asetet e tij të huaja tregtarit global të energjisë Gunvor Group, pasi u vendos nën sanksione perëndimore.
Javën e kaluar, Lukoil dhe një tjetër prodhues i madh rus i naftës, Rosneft, u goditën me kufizime nga Presidenti i SHBA-së Donald Trump, i cili tha se kjo ishte për shkak të mungesës së angazhimit ndaj procesit të paqes në Ukrainë nga ana e Moskës.
Masat e ashpra të Uashingtonit pasuan sanksione të ngjashme të vendosura ndaj dy firmave nga Mbretëria e Bashkuar. Rusia pohon se është e hapur të negociojë, por këmbëngul në një zgjidhje gjithëpërfshirëse që adreson shkaqet rrënjësore të konfliktit.
Lukoil tha të enjten se kishte marrë dhe pranuar një propozim nga Gunvor Group për të blerë degën e saj Lukoil International GmbH, e cila zotëron të gjitha asetet ndërkombëtare të kompanisë.
“Kushtet kryesore të transaksionit janë rënë dakord më parë nga palët”, thuhet në deklaratë.
Vlera e marrëveshjes, e cila ende duhet të marrë miratimin nga qeveria amerikane, nuk është njoftuar.
Lukoil shpjegoi se po hiqte qafe asetet e saj të huaja “për shkak të masave kufizuese të disa shteteve të futura kundër kompanisë dhe degëve të saj”.
Sipas një njoftimi të Thesarit të SHBA-së, dy kompanitë ruse kanë afat deri më 21 nëntor për të përfunduar operacionet në vazhdim. Por Lukoil dhe Gunvor mund të aplikojnë për një zgjatje në mënyrë që “të sigurojnë operacione të pandërprera të aseteve ndërkombëtare dhe shërbimin e tyre bankar për periudhën deri në përfundimin e transaksionit”, sipas deklaratës.
Lukoil, në pronësi private, është prodhuesi i dytë më i madh i naftës në Rusi, duke përbërë rreth 2% të prodhimit global. Kompania punëson më shumë se 100,000 njerëz në të gjithë botën, me projekte në Ballkan, Lindjen e Mesme, Afrikë, Azinë Qendrore, disa vende të BE-së dhe SHBA.
Deri në fund të vitit 2024, Lukoil mirëmbante një rrjet me pakicë prej rreth 2,500 stacionesh karburanti në 20 vende, duke eksportuar 730,000 fuçi naftë të papërpunuar në ditë dhe rreth 300,000 fuçi në ditë produkte nafte. Ai raportoi një fitim neto prej 10 miliardë dollarësh për vitin 2024 vitin e kaluar.
