Trump: Palestinezët s’kanë alternativë veçse të largohen nga Gaza
Presidenti amerikan, Donald Trump, ka deklaruar të martën se palestinezët nuk kanë alternativë tjetër vetëm se të lënë Gazën.
Gjatë nënshkrimit të një urdhri ekzekutiv për tërheqjen e SHBA-së nga agjencia kryesore e OKB-së për refugjatët palestinezë (UNRWA), presidenti amerikan është shprehur se do të donte që palestinezët e Gazës të zhvendoseshin në shtetet fqinje, Egjipt dhe Jordani, raporton Reuters.
Javën e kaluar Trumpi e ka përmendur për herë të parë idenë e tij që palestinezët e Gazës të shkonin në këto dy shtete, me arsyetimin se Gaza është e shkatërruar dhe ajo duhet të pastrohet e rindërtohet.
Mirëpo kërkesa nuk është pritur mirë nga palestinëzët, të cilët e konsiderojnë atë si përpjekje për “spastrim etnik” të Gazës.
Ndaj kërkesës së Trumpit ka reaguar edhe Gjermania, e cila ka thënë se është kundër që palestinezët të zhvendosen nga Gaza, dhe që të ndodhë rikolonizimi i saj nga Izraeli.
