Trump kërcënon Rusinë dhe Ukrainën me tërheqje nga negociatat
Presidenti i SHBA-së, Donald Trump, ka deklaruar se Shtetet e Bashkuara do të tërhiqen nga roli ndërmjetësues në bisedimet mes Rusisë dhe Ukrainës nëse ndonjëra nga palët e bën të pamundur arritjen e një marrëveshjeje.
Duke folur nga Zyra Ovale të premten, Trump tha se pavarësisht se nuk pret një armëpushim të menjëhershëm, ai shpreson që bisedimet të sjellin rezultate “sa më shpejt”.
“Ne po flasim për njerëz që vdesin këtu. Ne do ta ndalojmë atë, në mënyrë ideale. Por nëse njëra nga palët e bën shumë të vështirë, thjesht do t’u themi ‘ju jeni budallenj, njerëz të tmerrshëm’ dhe do të tërhiqemi nga ndërmjetësimi”, u shpreh Trump.
Komentet e tij vijnë pas paralajmërimit të Sekretarit të Shtetit, Marco Rubio, i cili theksoi se SHBA do të largohet nga bisedimet nëse nuk ka përparim konkret brenda disa ditësh. “Ne nuk do ta vazhdojmë këtë përpjekje për javë apo muaj të tërë”, tha Rubio, duke shtuar se SHBA ka “prioritete të tjera për t’u përqendruar”.
Ndërkohë, sulmet ruse në territorin ukrainas vijuan të premten, duke lënë dy të vdekur dhe mbi 100 të plagosur në qytetet verilindore Kharkiv dhe Sumy. Rusia, e cila nisi pushtimin e plotë të Ukrainës në vitin 2022, vazhdon të avancojë në pjesën lindore të vendit.
Zëdhënësi i Kremlinit, Dmitry Peskov, komentoi mbi deklaratat e Trump duke theksuar se negociatat “janë të vështira”, por pala ruse mbetet e hapur për dialog. “Ne po kërkojmë një zgjidhje paqësore që siguron interesat tona”, tha ai.
Përpjekjet diplomatike vazhdojnë edhe në nivel evropian. Nënpresidenti amerikan JD Vance, pas një takimi me kryeministren italiane Giorgia Meloni në Romë, u shpreh optimist: “Shpresojmë që kjo luftë shumë brutale të përfundojë së shpejti.”
Në një zhvillim paralel, SHBA dhe Ukraina kanë nënshkruar një memorandum mirëkuptimi për krijimin e një fondi investimi për rindërtimin e vendit. Marrëveshja, e cila synon të finalizohet deri më 26 prill, përfshin jo vetëm sektorin e mineraleve, por edhe infrastrukturën energjetike, naftën dhe gazin.
Zyrtarët ukrainas kanë rezistuar ndaj kërkesës së administratës Trump për t’i kthyer SHBA-së ndihmën ushtarake përmes këtij fondi, por duket se një kompromis është arritur. “Populli amerikan dëshiron të investojë përkrah popullit ukrainas në një Ukrainë të lirë, sovrane dhe të sigurt”, thuhet në dokumentin e publikuar nga qeveria ukrainase.
Ndërkohë, Ukraina mbetet në kërkim të garancive të forta sigurie nga SHBA për çdo marrëveshje të mundshme armëpushimi. Presidenti Zelensky i ka paralajmëruar udhëheqësit evropianë se një marrëveshje pa garanci do të ishte “e rrezikshme” për vendin e tij.
