Thirrje për BE-në që të ndalojë tregtinë me kolonitë izraelite në Bregun Perëndimor të pushtuar

Amnesty International dhe 162 organizata të shoqërisë civile dhe sindikata kanë nënshkruar një letër të përbashkët duke i bërë thirrje Bashkimit Evropian të ndalojë tregtinë dhe aktivitetet biznesore me vendbanimet izraelite në territoret palestineze të okupuara.

“Pavarësisht konsensusit të BE-së për paligjshmërinë e vendbanimeve dhe lidhjen e tyre me abuzime serioze, BE-ja vazhdon të tregtojë dhe të lejojë biznes me to,” thuhet në letër.

Kjo ndihmon në “abuzimet serioze dhe sistematike të të drejtave të njeriut dhe shkeljet e tjera të ligjit ndërkombëtar që mbështesin zgjerimin e vendbanimeve,” shtohet më tej.

Në korrik, Gjykata Ndërkombëtare e Drejtësisë dha një opinion këshillimor historik, duke konfirmuar se shtetet nuk duhet të njohin, ndihmojnë ose mbështesin situatën e paligjshme që buron nga okupimi izraelit i territorit palestinez.