Teprica tregtare e Kinës arrin nivele rekord në vitin 2025, pavarësisht luftës tarifore me SHBA-në
Teprica tregtare e Kinës arriti një nivel të ri rekord prej gati 1.2 trilionë dollarësh në vitin 2025, pavarësisht luftës tarifore me Shtetet e Bashkuara.
Të dhënat doganore të publikuara të mërkurën treguan se eksportet kineze u rritën me 5.5 për qind vitin e kaluar, duke arritur në gjithsej 3.77 trilionë dollarë. Sipas këtyre të dhënave, rritja e tregtisë me vende të tjera në mbarë botën kompensoi rënien e tregtisë me SHBA-në.
Importet mbetën të qëndrueshme në 2.58 trilionë dollarë, duke krijuar një suficit tregtar prej 1.19 trilionë dollarësh. Ky hendek ishte 992 miliardë dollarë në vitin 2024, para se presidenti Donald Trump të niste politikat e tij të paqëndrueshme tregtare.
Përballë tarifave agresive në tregun amerikan, kompanitë kineze u orientuan drejt klientëve në Azinë Juglindore, Afrikë, Amerikën Latine dhe Evropë.
Megjithatë, tregtia me Rusinë ra për herë të parë në pesë vjet, duke u tërhequr nga niveli rekord i vitit 2024, si pasojë e rënies së kërkesës ruse për makina kineze dhe uljes së vlerës së importeve kineze të naftës së papërpunuar ruse.
Kina i ka ofruar Rusisë një mbështetje të rëndësishme ekonomike, ndërsa ajo përballet me sanksionet amerikane dhe evropiane të vendosura për shkak të pushtimit të Ukrainës në shkurt të vitit 2022.
“Momenti për rritjen e tregtisë globale duket i pamjaftueshëm dhe mjedisi i jashtëm për zhvillimin e tregtisë së jashtme të Kinës mbetet i ashpër dhe kompleks,” tha Wang Jun, zëvendësministër në administratën doganore të Kinës, në një konferencë për shtyp të mërkurën.
Por, “me partnerë tregtarë më të larmishëm, aftësia (e Kinës) për të përballuar rreziqet është rritur ndjeshëm,” tha Wang, duke shtuar se bazat e tregtisë së jashtme të Kinës mbeten “të forta”.
Analistët thanë se kërkesa e fortë globale për çipa kompjuterikë dhe pajisje të tjera, si dhe për materialet e nevojshme për prodhimin e tyre, ishin ndër kategoritë që mbështetën eksportet kineze.
Në dhjetor, eksportet e Kinës u rritën me 6.6 për qind krahasuar me të njëjtën periudhë të vitit të kaluar në terma dollarë, më mirë se parashikimet e ekonomistëve dhe më lart se rritja vjetore prej 5.9 për qind në nëntor. Importet në dhjetor u rritën me 5.7 për qind në baza vjetore, krahasuar me 1.9 për qind në nëntor.
Teprica tregtare e Kinës e kaloi për herë të parë pragun e 1 trilion dollarëve në nëntor, kur diferenca arriti në 1.08 trilionë dollarë në 11 muajt e parë të vitit të kaluar.
Lynn Song, kryeekonomist për Kinën e Madhe në ING, tha se teprica rekord tregtare e Kinës e vendos atë në nivel me prodhimin e brendshëm bruto (PBB) të një ekonomie që renditet ndër 20 më të mëdhatë në botë.
“Kjo pritet ta ndihmojë Kinën të arrijë objektivin e saj të rritjes rreth 5 për qind, kur të publikohen të dhënat e PBB-së javën e ardhshme,” tha Song.
Ekonomistët presin që eksportet të vazhdojnë të mbështesin ekonominë kineze edhe këtë vit, pavarësisht tensioneve të vazhdueshme tregtare dhe gjeopolitike.
“Ne vazhdojmë të presim që eksportet të jenë një motor i madh i rritjes edhe në vitin 2026,” tha Jacqueline Rong, kryeekonomiste për Kinën në BNP Paribas. /Al Jazeera/
