Temperatura deri në 40 gradë, nga nesër valë e të nxehtit me indeks UV 9

Nën ndikimin e një mase ajrore të ngrohtë nga jugu, nga nesër (e mërkurë) deri të premten në gjithë vendin do të mbizotërojë mot shumë i nxehtë, njoftoi Drejtoria për Punë Hidrometeorologjike (DPHM). Temperaturat ditore do të tejkalojnë 30°C, ndërsa në disa vende pritet të arrijnë edhe mbi 40 gradë.

Përveç temperaturave të larta, vlera e indeksit UV do të jetë 9 – që paraqet një nivel shumë të lartë dhe sjell rrezik serioz për shëndetin në rast të ekspozimit të drejtpërdrejtë në diell. Qytetarëve u këshillohet të shmangin qëndrimin jashtë në periudhën nga ora 11 deri në 17, të veshin rroba të lehta dhe të konsumojnë më shumë lëngje.