Të paktën 28 të vdekur nga përmbytjet e mëdha të shkaktuara nga stuhitë tropikale në Meksikë

Përmbytjet e shkaktuara nga reshjet e dendura në Meksikë kanë lënë të paktën 28 persona të vdekur dhe disa të tjerë të zhdukur, si dhe kanë shkaktuar rrëshqitje dheu, dëmtime në shtëpi dhe autostrada, sipas autoriteteve lokale.

Reshjet e pandërprera në zonat e prekura në pjesën qendrore dhe juglindore të vendit çuan në daljen e lumenjve nga shtrati dhe shembjen e rrugëve, duke shkaktuar ndërprerje të energjisë elektrike në disa komuna, tha të premten koordinatorja kombëtare për mbrojtjen civile, Laura Velazquez.

Autoritetet raportuan reshje intensive në 31 nga 32 shtetet e vendit, me zonat më të goditura Veracruz-in në lindje, Queretaro-n dhe Hidalgo-n në qendër, si dhe shtetin veriqendror San Luis Potosi.

Një nga zonat më të dëmtuara është shteti qendror i Hidalgo-s, ku janë raportuar 16 viktima, sipas sekretarit të brendshëm të shtetit, Guillermo Olivares Reyna.

Të paktën 1,000 shtëpi, 59 spitale e klinika dhe 308 shkolla janë dëmtuar nga rrëshqitjet e dheut dhe dalja e lumenjve nga shtrati.

Në shtetin fqinj të Puebla-s, nëntë persona kanë humbur jetën dhe 13 të tjerë janë zhdukur. Sipas guvernatorit të shtetit, rreth 80,000 persona janë prekur nga reshjet e dendura, ndërsa një rrëshqitje dheu ka dëmtuar një tubacion gazi.

Në shtetin bregdetar të Gjirit të Meksikës, Veracruz, dy persona kanë vdekur, përfshirë një oficer policie, sipas guvernatorit të tij. Rreth 5,000 shtëpi janë dëmtuar dhe marina ka evakuuar afro 900 persona në strehimore.

Më herët, autoritetet në shtetin qendror të Queretaro-s konfirmuan se një fëmijë kishte humbur jetën pasi u përfshi në një rrëshqitje dheu.

Reshjet e dendura kanë shkaktuar gjithashtu ndërprerje të energjisë për mbi 320,000 përdorues dhe dëmtime në gati 1,000 kilometra rrugë në gjashtë shtete, thanë autoritetet.

Powerful waves crashed into Mexico’s Pacific coast as Hurricane Priscilla brought flooding along Puerto Vallarta’s waterfront. pic.twitter.com/P3s5lsiz9r

— AccuWeather (@accuweather) October 10, 2025

“Ne po punojmë për të ndihmuar popullatën, për të hapur rrugët dhe për të rikthyer shërbimet elektrike,” deklaroi presidentja Claudia Sheinbaum pas një takimi me zyrtarë lokalë dhe anëtarë të kabinetit. Ajo ndau foto të ekipeve të emergjencës që transportonin ndihma ndërsa lëviznin nëpër ujërat e përmbytjeve deri në gjunjë.

Shteti ka dislokuar mbi 8,700 trupa ushtarake për të ndihmuar në monitorimin, evakuimin dhe pastrimin e zonave të prekura.

Meksika është përballur me reshje jashtëzakonisht të dendura gjatë vitit 2025, me një rekord reshjesh të regjistruar në kryeqytetin Mexico City.

Stuhia tropikale “Raymond” aktualisht ndodhet pranë bregut Paqësor të vendit, duke sjellë reshje të dendura ndërsa lëviz drejt veriut. Parashikohet të godasë territorin meksikan të dielën. “Raymond” u shpall të enjten në mesditë nga Qendra Kombëtare Amerikane e Uraganeve, duke e bërë atë sistemin e tretë të këtij lloji këtë javë në bregun perëndimor të Meksikës, pas stuhive tropikale “Priscilla” dhe ciklonit post-tropikal “Octave”, që sollën rreziqe reshjesh dhe përmbytjesh në rrugën e tyre.

Meteorologët kanë paralajmëruar se modeli i ftohjes së Paqësorit, i njohur si La Niña – i cili ndikon motin globalisht dhe mund të fuqizojë uraganet – është rikthyer.

Edhe pse është ndoshta vonë në sezonin e uraganeve për të ndikuar klimën tropikale në Atlantik, ky fenomen La Niña mund të ketë pasoja të tjera, që variojnë nga reshje të dendura deri te thatësira në pjesë të ndryshme të botës. /Al Jazeera/