Të paktën 120 palestinezë vriten në Gaza në 48 orë
Të paktën 120 palestinezë të tjerë u vranë në sulmet izraelite në Rripin e Gazës në 48 orët e fundit, duke e çuar në 44.176 numrin e përgjithshëm të vdekjeve që nga tetori i vitit të kaluar, transmeton Anadolu.
Ministria e Shëndetësisë me bazë në Gaza tha se rreth 104.470 të tjerë janë plagosur si pasojë e sulmeve izraelite që nga 7 tetori i vitit të kaluar.
“Forcat izraelite vranë 120 njerëz dhe plagosën 205 të tjerë në shtatë masakra të familjeve në 48 orët e fundit. Shumë njerëz janë ende të bllokuar nën rrënoja dhe në rrugë pasi shpëtimtarët nuk janë në gjendje t’i arrijnë ata”, tha ministria palestineze.
Ushtria izraelite ka vazhduar luftën gjenocidale në Rripin e Gazës që nga sulmi i Hamasit vitin e kaluar, pavarësisht rezolutës së Këshillit të Sigurimit të OKB-së që bën thirrje për një armëpushim të menjëhershëm.
Njohja ndërkombëtare e gjenocidit në Gaza është rritur në vitin e dytë të luftës vdekjeprurëse izraelite, pasi organizatat dhe liderët i kanë etiketuar ngjarjet si një përpjekje të qëllimshme për të shkatërruar një popullsi.
Të enjten, Gjykata Ndërkombëtare Penale në një lëvizje historike njoftoi se lëshoi urdhërarreste për kryeministrin izraelit, Benjamin Netanyahu dhe ish-ministrin e Mbrojtjes, Yoav Gallant, duke i akuzuar për krime lufte dhe krime kundër njerëzimit në Gaza.
Izraeli gjithashtu përballet me një çështje gjenocidi në Gjykatën Ndërkombëtare të Drejtësisë për luftën vdekjeprurëse në Gaza.
