Tajlandë, 18 të vdekur dhe 32 të plagosur në një aksident autobusi

Të paktën 18 persona kanë humbur jetën dhe 32 të tjerë janë plagosur pasi një autobus është rrokullisur në provincën qendrore Prachin Buri të Tajlandës, transmeton Anadolu.

Siç njoftoi agjencia tajlandeze e lajmeve, autobusi me 49 pasagjerë, që ishte në një vizitë studimore në komunitet, u përmbys herët në mëngjes. Mësohet se 17 persona kanë humbur jetën në vend, ndërsa një tjetër ka ndërruar jetë në spital.

Nga hetimet paraprake dyshohet se shkak i aksidentit mund të ketë qenë një mos funksionim i frenave.

Kryeministri Paetongtarn Shinawatra shprehu ngushëllimet për familjet e të vdekurve dhe të plagosurve.

Ajo urdhëroi Ministrinë e Transportit që të hetojë incidentin dhe të marrë masa në rast të shkeljes së standardeve të sigurisë.