Starmer sot do të njoftojë njohjen e shtetit palestinez nga Mbretëria e Bashkuar
Sir Keir Starmer pritet të njoftojë njohjen e shtetit palestinez nga Mbretëria e Bashkuar në një deklaratë të dielën pasdite.
Kryeministri tha në korrik se qëndrimi i Mbretërisë së Bashkuar do të ndryshonte në shtator nëse Izraeli nuk përmbushte disa kushte, duke përfshirë rënien dakord për një armëpushim në Gaza dhe angazhimin për një proces paqeje afatgjatë që do të çonte në një zgjidhje me dy shtete.
Mbretëria e Bashkuar ka kërkuar prej kohësh një marrëveshje që do të shihte një shtet palestinez të bashkëjetonte me Izraelin – diçka nga e cila udhëheqja izraelite është hequr dorë që nga fillimi i luftës së saj me grupin e armatosur palestinez Hamas.
Lëvizja e kryeministrit ka tërhequr kritika të ashpra nga qeveria izraelite, familjet e pengjeve të mbajtura në Gaza dhe disa konservatorë.
Një numër vendesh të tjera, përfshirë Portugalinë, Francën , Kanadanë dhe Australinë, kanë thënë gjithashtu se do ta njohin shtetin palestinez, ndërsa Spanja, Irlanda dhe Norvegjia e ndërmorën këtë hap vitin e kaluar.
Palestina njihet aktualisht nga rreth 75% e 193 shteteve anëtare të OKB-së, por nuk ka kufij të dakordësuar ndërkombëtarisht, as kryeqytet dhe as ushtri – duke e bërë njohjen kryesisht simbolike.
Zgjidhja me dy shtete i referohet krijimit të një shteti palestinez në Bregun Perëndimor dhe Rripin e Gazës, me kryeqytet Jerusalemin Lindor. Izraeli aktualisht ka të pushtuar si Bregun Perëndimor ashtu edhe Gazën, që do të thotë se Autoriteti Palestinez nuk ka kontroll të plotë mbi tokën ose popullin e tij.
