Starmer: Ish-princi Andrew duhet të dëshmojë para Kongresit Amerikan për lidhjet me Epstein
Kryeministri britanik, Sir Keir Starmer, ka bërë thirrje që ish-princi Andrew të dëshmojë para Kongresit Amerikan lidhur me marrëdhëniet e tij me abuzuesin e dënuar seksual, Jeffrey Epstein.
Starmer theksoi se kushdo që posedon informacione relevante duhet të jetë i gatshëm t’i ndajë ato.
“Së pari, gjithmonë i jam qasur kësaj çështjeje duke pasur parasysh viktimat e Epstein. Viktimat duhet të jenë përparësia e parë. Sa i përket kërkimit të faljes, kjo është një çështje që i takon Andrew. Por, për sa i përket dhënies së dëshmisë, gjithmonë kam thënë se kushdo që ka informacion duhet të jetë i përgatitur ta ndajë atë në çfarëdo forme që i kërkohet. Nuk mund të jesh i përqendruar te viktimat nëse nuk je i përgatitur ta bësh këtë”, deklaroi Starmer.
Komentet e kryeministrit britanik vijnë pas publikimit të fundit të dosjeve që lidhen me Epstein, të cilat përfshijnë imazhe që pretendohet se tregojnë Andrew të gjunjëzuar mbi një grua të shtrirë në tokë. Dokumentet zbulojnë gjithashtu se Epstein kishte sugjeruar organizimin e një darke për Princin Andrew me një grua ruse “të zgjuar, të bukur dhe të besueshme”, 26-vjeçare, ofertë ndaj së cilës Andrew ishte përgjigjur se do të ishte “i kënaqur” ta takonte.
Departamenti Amerikan i Drejtësisë ka publikuar mbi tre milionë faqe dokumentesh që lidhen me Epstein, gjashtë javë pas afatit të përcaktuar nga një ligj i nënshkruar nga presidenti amerikan, Donald Trump.
Andrew Mountbatten-Windsor, i njohur më parë si Princi Andrew dhe Duka i Jorkut, u privua nga titujt e tij mbretërorë në tetor, pas intensifikimit të hetimeve mbi lidhjet e tij me Epstein. Ai ka mohuar vazhdimisht çdo shkelje.
