Spanja heton drejtuesit e një kompanie çeliku për tregti të dyshuar me një firmë izraelite armësh
Gjykata më e lartë penale e Spanjës ka hapur një hetim ndaj drejtuesve të kompanisë së çelikut Sidenor për bashkëpërfshirje të mundshme në krime kundër njerëzimit ose gjenocid, për shkak të tregtisë së tyre me një kompani izraelite të armëve.
Qeveria spanjolle kishte njoftuar më parë se kishte ndaluar çdo shkëmbim armësh me Izraelin pas fillimit të luftës në Gaza në tetor 2023.
Ky embargo u bë zyrtarisht ligj këtë muaj, si pjesë e masave që synojnë të ndalin atë që kryeministri Pedro Sanchez e ka quajtur “gjenocid në Gaza”.
Sipas Gjykatës Kombëtare (Audiencia Nacional), kryetari i Sidenor-it, Jose Antonio Jainaga Gomez, dhe dy drejtues të tjerë janë nën hetim për kontrabandë dhe bashkëpërfshirje në krime kundër njerëzimit ose gjenocid, pasi kanë shitur çelik për kompaninë Israel Military Industries.
Firma spanjolle e kishte shitur metalin pa marrë lejen e qeverisë dhe pa regjistruar transaksionin, duke ditur se materiali “do të përdorej për prodhimin e armëve”, thuhet në njoftimin e gjykatës.
Gjykata shtoi se vetë kompania nuk është nën hetim, falë disa punonjësve sinjalizues që kanë kontribuar në paraqitjen e padisë dhe kanë ndihmuar “në parandalimin e vazhdimit të aktivitetit të dyshuar kriminal”.
Gjykatësi hetues ka thirrur tre të dyshuarit për të dëshmuar më 12 nëntor, pas një padie të ngritur nga një shoqatë pro-palestineze.
Kompania Sidenor nuk iu përgjigj një kërkese për koment nga agjencia AFP.
