Shembet miniera e arit në Guinea, humbin jetën të paktën 11 persona, 10 prej tyre gra
Të paktën 11 persona kanë humbur jetën pas shembjes së një pjese të një miniere ari të improvizuar në lindje të Guinea, njoftoi Kryqi i Kuq për AFP.
Sipas të dhënave zyrtare, 10 gra dhe një burrë u vranë nga rrëshqitja e dheut që ndodhi të mërkurën pranë komunës Kondianakoro, në pjesën lindore të vendit. Përfaqësuesja e Kryqit të Kuq, Amara Diallo, bëri të ditur se gratë po punonin në minierë në momentin e shembjes dhe trupat e tyre u nxorën disa orë më vonë nga rrënojat.
Një i ri ndërroi jetë të enjten si pasojë e plagëve të marra, duke e çuar numrin e viktimave në 11.
Sipas informacioneve paraprake, viktimat kishin shkuar në minierë për të “pastruar dhe përpunuar mbetjet e xehes”, një praktikë e përhapur në zonat ku nxjerrja e arit bëhet në mënyrë artizanale. Gjatë procesit, një mur i një prej galerive u shemb dhe sasi të mëdha dheu, të shkaktuara nga presioni, i varrosën punëtorët, tha një zyrtar lokal për AFP-në.
Tragjedia ka rikthyer në vëmendje rreziqet serioze që paraqesin minierat e improvizuara, ku shpesh mungojnë kushtet bazë të sigurisë. “Aksidente të ngjashme ndodhin shpesh në rajon, por ato nuk i dekurajojnë minatorët e paligjshëm”, theksoi Diallo.
Ndërkohë, ka pasur deklarata kontradiktore mbi kombësinë e viktimave. Sipas Kryqit të Kuq, të gjithë ishin shtetas të Guinesë, ndërsa kryetarja e bashkisë së Kondianakoro, Banju Haoua Keita, deklaroi se 10 prej grave ishin nga Burkina Faso.
Guinea, me rreth 15 milionë banorë, është e pasur me burime minerale si boksiti, hekuri, diamantet dhe ari. Megjithatë, sipas të dhënave të Programi Botëror i Ushqimit, rreth 7.7 milionë banorë jetojnë në varfëri, çka i shtyn shumë prej tyre të kërkojnë të ardhura në sektorin informal dhe shpesh të rrezikshëm të minierave artizanale.
