SHBA shpall Vëllazërinë Myslimane në Egjipt, Liban dhe Jordani si “terroriste”

Shtetet e Bashkuara kanë shpallur organizatat e Vëllazërisë Myslimane në Egjipt, Liban dhe Jordani si grupe “terroriste”, teksa Uashingtoni po intensifikon goditjen ndaj rivalëve të Izraelit në mbarë botën.

Vendimi i marrë të martën vjen disa javë pasi presidenti Donald Trump nxori një urdhër ekzekutiv që udhëzonte administratën e tij të niste procesin e futjes së këtyre grupeve në listën e zezë.

Departamenti Amerikan i Thesarit i etiketoi grupet në Jordani dhe Egjipt si “terroristë globalë të përcaktuar posaçërisht”, ndërsa Departamenti i Shtetit e futi organizatën libaneze në listën me një përcaktim edhe më të rëndë – “organizatë e huaj terroriste” (FTO).

Administrata Trump e justifikoi këtë vendim me mbështetjen e supozuar për grupin palestinez Hamas dhe me “veprimtari kundër interesave izraelite në Lindjen e Mesme”.

“Degët e Vëllazërisë Myslimane pretendojnë se janë organizata qytetare legjitime, ndërsa prapa skenave mbështesin hapur dhe me entuziazëm grupe terroriste si Hamasi”, thuhet në deklaratën e Thesarit amerikan.

Salah Abdel Haq, udhëheqës i përkohshëm i Vëllazërisë Myslimane Egjiptiane, tha se grupi “e refuzon kategorikisht këtë përcaktim dhe do të ndjekë të gjitha rrugët ligjore për ta kundërshtuar këtë vendim që dëmton miliona myslimanë në mbarë botën”.

Abdel Haq sugjeroi të martën se presioni nga Izraeli dhe Emiratet e Bashkuara Arabe në Uashington e shtyu administratën Trump të marrë këtë vendim.

“Ne i mohojmë të gjitha akuzat se Vëllazëria Myslimane Egjiptiane ka drejtuar, financuar, ofruar mbështetje materiale apo është përfshirë në terrorizëm”, tha ai për Al Jazeera.

“Ky përcaktim nuk mbështetet në prova të besueshme dhe pasqyron presion të jashtëm nga Emiratet e Bashkuara Arabe dhe Izraeli, më shumë sesa një vlerësim objektiv të interesave amerikane apo të fakteve në terren.”

Vendimet e Uashingtonit e bëjnë të paligjshme ofrimin e mbështetjes materiale për këto grupe dhe vendosin sanksione ekonomike për t’u ndërprerë burimet e financimit. Etiketa FTO përfshin edhe ndalimin e anëtarëve të këtyre grupeve për të hyrë në SHBA.

Vëllazëria Myslimane

E themeluar në vitin 1928 nga dijetari mysliman egjiptian Hasan al-Banna, Vëllazëria Myslimane ka degë dhe filiale në mbarë Lindjen e Mesme, përfshirë parti politike dhe organizata shoqërore.

Grupi dhe organizatat e lidhura me të deklarojnë se janë të përkushtuara ndaj pjesëmarrjes paqësore politike.

Dega e Vëllazërisë Myslimane në Liban, e njohur si al-Jamaa al-Islamiya, është e përfaqësuar në Parlamentin libanez.

Në Jordani, grupi fitoi 31 ulëse në Dhomën e Përfaqësuesve në zgjedhjet e vitit 2024 përmes krahut të tij politik, Frontit të Veprimit Islamik.

Megjithatë, autoritetet jordaneze e ndaluan organizatën vitin e kaluar, duke e akuzuar për lidhje me atë që qeveria e Jordanisë e quajti një komplot sabotimi.

Vëllazëria Myslimane Egjiptiane fitoi zgjedhjet e vetme presidenciale të mbajtura në mënyrë demokratike në Egjipt në vitin 2012. Por presidenti Mohamed Morsi u rrëzua një vit më vonë me një grusht shteti ushtarak dhe vdiq në burg në vitin 2019.

Që nga viti 2013, Kajroja e ka shpallur të paligjshme Vëllazërinë Myslimane dhe ka ndërmarrë një goditje të gjerë ndaj udhëheqësve dhe anëtarëve të saj, duke e detyruar organizatën të kalojë në ilegalitet dhe mërgim.

Të martën, Ministria e Jashtme e Egjiptit e përshëndeti vendimin e SHBA-së për shpalljen e degës egjiptiane të Vëllazërisë Myslimane si “terroriste globale”, duke e quajtur atë “një hap kyç”.

Në një deklaratë, ministria tha se vendimi i Uashingtonit “pasqyron rrezikshmërinë e këtij grupi dhe ideologjinë e tij ekstremiste, si dhe kërcënimin e drejtpërdrejtë që ai paraqet për sigurinë dhe stabilitetin rajonal dhe ndërkombëtar”.

Organizatat e Vëllazërisë Myslimane kanë qenë kritikë të zëshëm të luftës gjenocidale të Izraelit në Gaza brenda vendeve të tyre.

Al-Jamaa al-Islamiya mbështeti Hezbollahun në “frontin mbështetës” në solidaritet me Gazën kundër Izraelit, çka kulmoi me një luftë të gjithanshme në shtator 2024.

Pas dekretit të Trumpit në nëntor, deputeti libanez Imad al-Hout theksoi se al-Jamaa al-Islamiya është një organizatë politike e licencuar në Liban dhe nuk ka lidhje me forca të huaja.

“Vlerësimi i çdo force politike libaneze rregullohet ekskluzivisht nga Kushtetuta dhe ligjet libaneze, e jo nga klasifikime politike të jashtme që lidhen me interesa dhe politika amerikane që mbështesin armikun izraelit dhe nuk kanë lidhje me realitetin libanez”, tha al-Hout në një deklaratë.

Pasojat në SHBA

Në SHBA dhe në vende të tjera perëndimore, aktivistë të djathtë kanë tentuar prej vitesh të demonizojnë komunitetet myslimane emigrante dhe kritikët e Izraelit, duke i akuzuar për lidhje me Vëllazërinë Myslimane.

Disa nga aleatët më të ashpër të Trumpit në Kongres kanë kërkuar prej vitesh futjen e këtij grupi në listën e zezë.

Pas dekretit të Trumpit për shpalljen e degëve të Vëllazërisë Myslimane në Liban, Egjipt dhe Jordani si “organizata terroriste”, guvernatorët republikanë të Teksasit dhe Floridës ndërmorën masa kundër organizatës kryesore për të drejtat civile të myslimanëve në SHBA.

Të dyja shtetet e shpallën Këshillin për Marrëdhëniet Amerikano-Islamike (CAIR), së bashku me Vëllazërinë Myslimane, si “organizata terroriste”.

CAIR, e cila mohon çdo lidhje me Vëllazërinë Myslimane, ka ngritur padi kundër tyre si kundërpërgjigje. /Al Jazeera/