ShBA-ja mbështet vendimin e Izraelit për të bllokuar ndihmën për Gazën
ShBA-ja mbështeti lëvizjen e Izraelit për ta ndalur ndihmën humanitare për Gazën pas refuzimit të një marrëveshjeje të re armëpushimi nga Hamasi, thanë raportet e shtypit të dielën.
Shtëpia e Bardhë ka shprehur mbështetjen për vendimin e Izraelit për ta bllokuar ndihmën për Gazën pasi Hamasi refuzoi të pajtohej me një fazë të dytë të marrëveshjes së armëpushimit, sipas një deklarate nga Këshilli i Sigurisë Kombëtare, raportoi The Hill.
“Izraeli ka negociuar në mirëbesim që nga fillimi i kësaj administrate për të siguruar lirimin e pengjeve”, tha zëdhënësi i Këshillit të Sigurisë Kombëtare, Brian Hughes.
“Ne do të mbështesim vendimin e tyre për hapat e ardhshëm duke qenë se Hamasi ka treguar se nuk është më i interesuar për një armëpushim të negociuar,” citoi media të ketë thënë ai.
Qeveria izraelite ndaloi hyrjen e ndihmave humanitare në Gaza herët të dielën, disa orë pasi skadoi faza e parë e marrëveshjes së armëpushimit të Gazës.
Marrëveshja kishte ndalur luftën gjenocidale të Izraelit në Gaza, e cila ka vrarë më shumë se 48,380 njerëz, kryesisht gra dhe fëmijë, dhe e ka lënë enklavën në gërmadha.
Nëntorin e kaluar, Gjykata Penale Ndërkombëtare lëshoi urdhërarrest për kryeministrin izraelit Benjamin Netanyahu dhe ish-ministrin e tij të mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një akuzë gjenocidi në Gjykatën Ndërkombëtare të Drejtësisë për luftën e tij në enklavë.
