Sekretari amerikan i Mbrojtjes vendos pllakën me mbishkrimin “Departamenti i Luftës” në hyrje të Pentagonit
Sekretari amerikan i Mbrojtjes, Pete Hegseth, instaloi personalisht të enjten një pllakë të re prej bronzi me mbishkrimin “Departamenti i Luftës” në hyrje të Pentagonit, transmeton Anadolu.
“Mirë se vini në Departamentin e Luftës”, tha departamenti në platformën amerikane sociale X, duke shpërndarë një video ku shihet Hegseth duke shtrënguar vidat për të varur pllakën.
Presidenti Donald Trump nënshkroi një urdhër ekzekutiv në shtator, i cili synon ta riemërtojë Departamentin e Mbrojtjes në “Departamenti i Luftës” dhe sinjalizoi se do t’i drejtohej Kongresit për ta bërë ndryshimin zyrtar.
“Mendoj se kjo dërgon një mesazh fitoreje. Mendoj se dërgon një mesazh force, shumë të fortë, shumë më të fortë sesa mund ta kuptojnë njerëzit”, u tha ai gazetarëve në Zyrën Ovale.
Trump tha se do të punojë me Kongresin për ta kodifikuar ndryshimin, por pretendoi se nuk është e qartë nëse ligjvënësit duhet të veprojnë për ta bërë atë zyrtar.
Kongresit i jepet autoriteti, sipas Kushtetutës së SHBA-së, për të krijuar, themeluar dhe riemërtuar agjenci federale.
Departamenti i Luftës u themelua në vitin 1789, 13 vjet pas miratimit të Deklaratës së Pavarësisë së SHBA-së në vitin 1776. Ai u riemërtua me legjislacion të nënshkruar nga presidenti Harry Truman menjëherë pas përfundimit të Luftës së Dytë Botërore, një kohë kur shumë shpresonin për fundin e konflikteve globale.
