Rrëmbim i rremë në Ohër: I riu i dërgoi vetes mesazh dhe kërkoi para për “lirimin” e tij

Një banor i Ohrit, për të cilin dje u raportua se ishte rrëmbyer, në fakt e kishte dërguar vetë mesazhin dhe kishte kërkuar para për t’u “liruar”.

Ai është gjetur dje, ndërsa rrëmbimi i supozuar ka ndodhur të enjten (më 16 prill).

“Me 16 prill, në orën 13:00, ai kishte dërguar një mesazh në numrin e telefonit të vëllait të tij, duke pretenduar se ishte rrëmbyer nga persona të panjohur, të cilët kërkonin para për lirimin e tij. Pas dokumentimit të plotë të ngjarjes, SPB Ohër do të paraqesë kallëzim penal për paraqitje të rreme të një vepre penale”, njoftuan nga policia.

Ngjarja u raportua në polici se gjoja rrëmbimi kishte ndodhur në lagjen Racha në Ohër, nga persona të panjohur me një veturë “Volkswagen Golf”.