Rashiq: Preferoj koalicion LVV-LDK për formimin e Qeverisë
Nënkryetari i Kuvendit të Kosovës nga radhët e komunitetit serb, Nenad Rashiq ka deklaruar se Lista Serbe gjithnjë është kundër tij sa i përket pozitës së tij të re në Kuvendin e Kosovës.
I pyetur për formimin e qeverisë, Rashiq u shpreh se do të donte që Qeveria të ketë një mazhorancë stabile, për arsye siç tha ai të sfidave dhe marrëdhënieve ndërkombëtare.
Ndërsa, i pyetur për koalicione, ky i fundit shprehi dëshirën që LVV dhe LDK të bëjnë koalicion mes vete për formimin e Qeverisë së Kosovës.
“Si zakonisht Lista Serbe në cilëndo formë që unë jam i unkoporuar për ndonjë pozitë apo situatë zgjedhor ata gjithë janë kundër e kanë një organizim brutal, prandaj nuk është befasi prej tyre. Unë kisha qenë i gëzuar që të kemi një qeveri një mazhorancë stabile për shkaqe të sfidave që kemi, për shkak të marrëdhënieve ndërkombëtare, prandaj unë kisha qenë i gëzuar që të jetë LVV të bëjë koalicion me LDK, atëherë do të kishim pas një numër më të madh të deputetëve, nëse isha vetë unë në ndonjë formë ose një moment do të inkurajojë Kurtin që është e mundshme një koalicion të lind sepse siq kemi konfirmuar edhe më herët kanë treguar një seriozitet institucional dhe unë e vlerësoj një gjë të tillë”, ka deklaruar Rashiq në emisionin “Mesditë” në Tëvë1.
Tutje, Rashiq ka komentuar qëndrimin e PDK-së, e cila nuk e ka mbështetur votimin e tij si nënkryetar i Kuvendit të Kosovës.
Ai tha se e kupton pozicionin e disa partive politike, të cilat tani po e perceptojnë veten si udhëheqëse dhe potencialisht ndër partitë më të mëdha në Kosovë.
Madje, ai theksoi se barrikadimi politik nga ana e PDK-së është ende i pranishëm, duke sugjeruar se kjo parti nuk është e gatshme të bashkëpunojë.
“Për mua është pak befasi që do parti politike e kanë një kryelartësi ku po perceptojnë që kanë qenë udhëheqësit dhe mund të jenë në të ardhmen dhe po e konsiderojnë vetën si një prej partive politike më të mëdha në Kosovë, unë e kuptoj këtë aspekt. Ai barrikadim është ende prezent sa i përket PDK-së”, tha ndër të tjera Rashiq./teve1.info/
