Projekti që sjell siguri: Mexhiti dhe Sejdiu nënshkruajnë marrëveshje për Zhelinën
Zëvendëskryeministri dhe njëherësh lider i VLEN-it, Izet Mexhiti, ka njoftuar fillimin e punimeve për rregullimin e shtratit të lumit në fshatin Kapazhdoll, Komuna e Zhelinës. Projekti, i cili kap vlerën mbi 6 milionë denarë, u formalizua me nënshkrimin e marrëveshjes së bashkëpunimit me kryetarin e komunës, Blerim Sejdiu.
“Probleme që u lanë pas dore për vite, sot po i zgjidhim”, deklaroi Mexhiti, duke theksuar rëndësinë e këtij investimi për mbrojtjen e banorëve nga përmbytjet dhe garantimin e sigurisë për shtëpitë, tokat bujqësore dhe rrugët e zonës.
Projekti përfshin pastrimin dhe sistemimin e shtratit të lumit, ndërtimin e mureve mbrojtëse dhe rikonstruktimin e pjesëve të dëmtuara të infrastrukturës.
“Edhe fshatrat e vegjël meritojnë kujdes dhe investim, po aq sa qytetet. Ky është standardi ynë,” theksoi Mexhiti, duke nënvizuar përkushtimin për zhvillim të barabartë dhe zgjidhje konkrete për komunitetet lokale.
