Presidenti serb akuzohet se ka marrë pjesë në “safari snajperësh” që vrisnin civilë në Sarajevë
Presidenti i Serbisë është akuzuar për përfshirje në “safari snajperësh” në Sarajevë gjatë Luftës së Bosnjës, ku të huaj të pasur thuhet se kanë paguar shuma të mëdha parash për të qëlluar mbi civilët.
Pretendohet se Aleksandar Vuçiq ka qenë i pranishëm në një nga pozicionet ushtarake mbi qytet, nga ku të huajt dyshohet se paguanin për të qëlluar banorët gjatë rrethimit të viteve 1992–1996.
Janë shfaqur edhe pamje filmike ku ai duket si i ri duke udhëtuar me një automjet me katër rrota, i cili në bagazh kishte një kafkë njeriu me një helmetë blu të paqeruajtësve të Kombeve të Bashkuara.
Pretendimet ndaj z. Vuçiq – të cilat ai i mohon fuqishëm – janë bërë nga Domagoj Margetiq, një gazetar kroat investigativ.
Ai ka paraqitur një ankesë ndaj presidentit te prokurorët italianë, të cilët tashmë po hetojnë pretendime se italianë, rusë dhe amerikanë kanë marrë pjesë në “safari snajperësh ndaj njerëzve” gjatë konfliktit.
Z. Margetiq tha: “E kam informuar zyren e prokurorit publik për të gjitha njohuritë e mia rreth lidhjes së Aleksandar Vuçiqit me safaritë ndaj njerëzve në Sarajevon e kohës së luftës.
Kam bashkëngjitur të gjitha provat, materialet filmike, dokumentacionin fotografik, dokumentacionin audio e video, si dhe dokumentacionin mediatik nga ajo kohë”.
Në parashtresën e tij, z. Margetiq pretendoi se z. Vuçiq ishte “anëtar i një njësie paramilitare, nën kontrollin e Partisë Radikale Serbe nga Serbia, gjatë viteve të luftës 1992 dhe 1993”.
Njësia ishte “e vendosur në një pozicion lufte… në varrezat hebraike në Sarajevë”, pretendoi z. Margetiq. Këto varreza janë përdorur nga forcat serbe si pozicion snajperësh.
Më shumë se 10,000 njerëz u vranë nga bombardimet dhe zjarri i snajperëve gjatë rrethimit.
Z. Margetiq pretendoi më tej se informacionet “e vendosin atë pa asnjë dyshim në kohën dhe vendin e këtyre krimeve”.
Ai përmendi pamje filmike nga viti 1993 që, sipas tij, tregonin z. Vuçiq duke mbajtur një pushkë.
Mbështetësit e liderit serb i kanë hedhur poshtë pretendimet dhe kanë thënë se objekti në pamje ishte një trekëmbësh kamere televizive, të cilin Vuçiq e mbante sepse në atë kohë punonte si gazetar.
