Presidenti Begaj nga Shkupi zhvendoset në Tetovë, Gostivar dhe Dibër

Në Tetovë, Gostivar dhe Dibër sot do të ketë regjim të posaçëm trafiku për shkak të qëndrimit të presidentit të Shqipërisë, Bajram Begaj, i cili po e përmbyll vizitën zyrtare treditore në vend.

Komuna e Tetovës dhe SPB Tetovë informojnë se sot në qytet do të ketë masa të përkohshme sigurie, regjim të posaçëm në komunikacion dhe ndalim parkimi në disa rrugë me rastin e vizitës së presidentit të Republikës së Shqipërisë në Tetovë.

Komuna e Tetovës rekomandon që automjetet të mos parkohen në bulevardet kryesore të qytetit.

“Automjetet e parkuara në kundërshtim me njoftimin do të largohen nga shërbimet përkatëse”, njoftojnë nga Komuna e Tetovës.

SPB Tetovë apelon te të gjithë pjesëmarrësit në komunikacion që t’i respektojnë urdhrat dhe udhëzimet e policisë, me qëllim zhvillimin e papenguar dhe të sigurt të trafikut.

Sipas agjendës, presidenti Begaj do të vizitojë Komunën e Tetovës, SHFK “Liria”, Xhaminë e Larme dhe Arabati Baba Teqe.

Pas vizitës në Komunën e Gostivarit, Begaj do ta përmbyllë qëndrimin me një vizitë në Dibër, prej nga në orët e pasdites, përmes pikës kufitare Bllatë, do të kthehet në Shqipëri.

Nga SPB Dibër njoftuan se do të jetë në fuqi regjim i posaçëm trafiku për të mundësuar lëvizjen e papenguar të delegacionit dhe zhvillimin e aktiviteteve të planifikuara.

Për këtë qëllim, zyrtarë policorë nga SPB Dibër dhe SPB Ohër do të sigurojnë fizikisht trasenë e lëvizjes dhe objektet ku janë paraparë takimet e punës. Masat do të nisin më 28 shkurt nga ora 12:00 dhe do të zgjasin deri në ora 19:00, informoi Stefan Dimoski, zëdhënës i Sektorit për Punë të Brendshme – Ohër.

Regjimi i posaçëm do të zbatohet me mbyllje të përkohshme të rrugës rajonale R-1202 nga Ura e Boshkut deri në Dibër, në disa rrugë të qytetit, si dhe në aksin Dibër – pika kufitare Bllatë.

Sipas Komunës së Dibrës, Begaj do të takohet me kryetarin e komunës, Fisnik Mela, por nuk janë paraparë deklarata për media.