Policia britanike lançon chatbot-in e parë inteligjent, kush është “Bobbi”

Policia në Britani ka lançuar chatbot-in e parë me AI që u përgjigjet pyetjeve jo urgjente online.

Bobbi nuk heton krime dhe nuk zëvendëson policët, ai thjesht jep përgjigje për pyetjet më të shpeshta, me qëllim që të lehtësojë ngarkesën mbi operatorët e thirrjeve dhe sportelet e shërbimit.

“Kjo është hera e parë që kjo teknologji përdoret në polici në MB,” tha një zëdhënës i policisë.

“Bobbi ndërvepron si njeri, por është plotësisht i automatizuar.”

Bobbi, polici inteligjent, nuk mund të përdoret për të raportuar krime dhe nuk zëvendëson linjën emergjente 999 të Mbretërisë së Bashkuar.

Nëse nuk mund t’i përgjigjet një pyetje, ose nëse përdoruesi kërkon të flasë me një agjent të policisë, biseda kalon te një operator.

Më shumë se 200 persona, përfshirë përfaqësues nga organizatat e kujdesit ndaj viktimave dhe panelet e pavarura të mbikëqyrjes, e kanë testuar tashmë sistemin.

Bobbi, një nofkë britanike për policinë, ndjek të njëjtat udhëzime si operatorët njerëzorë dhe mund të japë rekomandime bazuar në këshilla zyrtare.

Policia e Thames Valley dhe ajo e Hampshire & Isle of Wight thonë se janë të parat në MB që përdorin këtë teknologji.