Përmbytje katastrofike godasin Teksasin, 25 të vdekur
Stuhitë e forta shkaktuan përmbytje të rënda përgjatë lumit Guadalupe në Teksas, duke rezultuar në 25 viktima, evakuime masive dhe operacione emergjente shpëtimi.
Përmbytjet nisën vonë të enjten dhe vazhduan deri në orët e para të së premtes, pasi reshjet e dendura frynë lumin Guadalupe duke e çuar nivelin e tij mbi 11,8 metra, më i larti që nga përmbytja e madhe e vitit 1987.
Zyra e Sherifit të Kerr County konfirmoi numrin e viktimave në një konferencë për shtyp.
Zëvendësguvernatori i Teksasit, Dan Patrick, tha se rreth 20 persona janë ende të zhdukur, shumë prej tyre nga Camp Mystic, një kamp veror për vajza.
Patrick e përshkroi situatën si “përmbytje në nivel katastrofik” dhe konfirmoi se “qindra persona”, së bashku me të paktën 14 helikopterë dhe 12 dronë, janë angazhuar në operacionet e kërkim-shpëtimit.
Deklarata zyrtare e katastrofës, e nënshkruar nga gjyqtari i qarkut, Rob Kelly, thekson se përmbytja ka shkaktuar “dëme të gjera dhe të rënda, lëndime dhe humbje jetësh”, dhe se ekziston ende “rrezik i menjëhershëm për përkeqësim të mëtejshëm.”
Shërbimi Kombëtar i Motit (NWS) lëshoi një paralajmërim për përmbytje të menjëhershme për pjesë të qarkut jugperëndimor Concho dhe juglindor Tom Green, i vlefshëm deri në orën 10:30 të mëngjesit me kohën lokale.
Banorët janë urdhëruar të qëndrojnë në shtëpi dhe të lëvizin në zona më të larta nëse ndodhen pranë përronjëve apo lumenjve.
