Pas reagimit të këshilltarëve të VLEN-it në Qytetin e Shkupit – certifikatat edhe në shqip

Këshilltarët e VLEN-it në Qytetin e Shkupit kanë reaguar ndaj certifikatave të mandateve që u lëshuan vetëm në një gjuhë, duke e cilësuar këtë si rezultat të neglizhencës së udhëheqësisë së kaluar të qytetit, të përbërë nga koalicioni BDI–Levica–Danella.

Sipas këshilltarit të VLEN-it, Zekerija Berisha, ky veprim përbën një shkelje të Ligjit për përdorimin e gjuhëve dhe tregon vazhdimësinë e injorimit ndaj të drejtave gjuhësore të qytetarëve shqiptarë.

“Ne si Këshilltarë të VLEN-it kemi reaguar menjëherë, duke kërkuar që certifikatat të jenë në përputhje me ligjin dhe në dy gjuhë. Pas reagimit tonë, Komisioni Komunal Zgjedhor ka pranuar kërkesën dhe nesër në ora 10:00 do të marrim certifikatat e reja në dygjuhësi,” deklaroi Berisha.

Ai shtoi se respektimi i gjuhës shqipe është detyrim ligjor dhe vlerë e barazisë, ndërsa VLEN do të mbetet gjithmonë në anën e ligjit, dinjitetit dhe respektit të gjuhës shqipe.