Paralajmëron Danimarka: Kërcënimi i Trump mund të jetë “fundi i NATO-s”
Kryeministrja e Danimarkës, Mette Frederiksen, ka paralajmëruar se çdo përpjekje e Shteteve të Bashkuara për të pushtuar Groenlandën do të rezultojë në fundin e aleancës ushtarake të NATO-s, pasi pasojat e sulmit ushtarak të Uashingtonit ndaj Venezuelës dhe rrëmbimit të udhëheqësit të saj ndihen në të gjithë globin.
Frederiksen i bëri komentet të hënën pas thirrjeve të fundit të Presidentit të SHBA-së Donald Trump që ishulli Arktik të vihet nën kontrollin e drejtpërdrejtë të Uashingtonit.
Trump u tha gazetarëve të dielën se do të “fliste për Groenlandën brenda 20 ditësh”. Ai ka pohuar se Groenlanda duhet të jetë nën juridiksionin e SHBA-së dhe kërcënimi i tij i fundit erdhi vetëm një ditë pasi forcat amerikane rrëmbyen udhëheqësin venezuelian Nicolas Maduro dhe gruan e tij.
Ky operacion ushtarak ka shkaktuar alarm në Danimarkë dhe Groenlandë, e cila është një territor gjysmëautonom i mbretërisë daneze dhe kështu pjesë e NATO-s.
“Nëse Shtetet e Bashkuara zgjedhin të sulmojnë ushtarakisht një vend tjetër të NATO-s, atëherë gjithçka ndalet. Kjo do të thotë, duke përfshirë NATO-n tonë dhe kështu sigurinë që është ofruar që nga fundi i Luftës së Dytë Botërore”, tha Frederiksen.
Trump nuk e ka përjashtuar përdorimin e forcës ushtarake për të marrë kontrollin e Groenlandës, dhe muajin e kaluar, Guvernatori i Luizianës, Jeff Landry, i cili mbështet publikisht aneksimin, u emërua si i dërguar special në ishullin Arktik të pasur me minerale.
Katie Miller, gruaja e zëvendësshefit të stafit të Trump, Stephen Miller, postoi të shtunën në X imazhin e diskutueshëm të territorit autonom danez me ngjyrat e flamurit amerikan. Postimi i saj kishte vetëm një fjalë sipër: “SË SHPEJTI”.
Kryeministri i Groenlandës, Jens-Frederik Nielsen, e quajti atë postim “mungesë respekti”.
“Marrëdhëniet midis kombeve dhe popujve ndërtohen mbi respektin e ndërsjellë dhe të drejtën ndërkombëtare, jo mbi gjeste simbolike që shpërfillin statusin dhe të drejtat tona. Nuk ka as arsye për panik dhe as për shqetësim. Vendi ynë nuk është në shitje dhe e ardhmja jonë nuk vendoset nga postimet në mediat sociale”, tha ai në X.
Pozicioni strategjik i Groenlandës midis Evropës dhe Amerikës së Veriut e bën atë një vend kyç për sistemin amerikan të mbrojtjes nga raketat balistike, dhe pasuria e saj minerale është tërheqëse, pasi Uashingtoni shpreson të zvogëlojë varësinë e tij nga eksportet kineze.
“Grenlanda është e mbuluar me anije ruse dhe kineze kudo. Ne kemi nevojë për Groenlandën nga pikëpamja e sigurisë kombëtare dhe Danimarka nuk do të jetë në gjendje ta bëjë këtë”, tha Trump të dielën.
