Osmani: NATO nuk është vetëm forcë, por simbol i paqes dhe shpresës

Presidentja e Kosovës, Vjosa Osmani, ka pranuar në Lubjanë Çmimin “Women for Peace and Security” nga Asambleja Parlamentare e NATO-s.

Në fjalimin e saj, ajo e cilësoi këtë çmim si një nder të veçantë, të cilin e pranoi në emër të popullit të Kosovës dhe sidomos të grave të vendit që, siç tha ajo, “kanë udhëhequr rezistencën paqësore, kanë luftuar për liri dhe kanë ndërtuar paqen”.

Presidentja Osmani theksoi se pa gratë nuk mund të ketë paqe të plotë, siguri të qëndrueshme apo demokraci të vërtetë. Ajo kujtoi rolin vendimtar të NATO-s në çlirimin e Kosovës, duke e quajtur Aleancën “jo një fortesë force, por një simbol paqeje dhe një forcë për të mirë”.

Në fjalën e saj, Osmani theksoi angazhimin e Kosovës për zbatimin e agjendës “Gratë, Paqja dhe Siguria”, duke përmendur Forumin Ndërkombëtar që mbahet çdo vit në Prishtinë dhe themelimin e Qendrës Rajonale të Ekselencës për këtë agjendë.
Ajo gjithashtu bëri thirrje për unitet të vendeve demokratike kundër autokratëve dhe diktatorëve, duke theksuar se “pa gratë në tryezë, paqja nuk është e qëndrueshme, dhe kur gratë përfshihen, paqja vjen më shpejt dhe zgjat më shumë”.

“Ky çmim do të qëndrojë në Zyrën e Presidentit, por çdo ditë do të frymëzojë një popull të tërë,” përfundoi Osmani, duke falënderuar Asamblenë Parlamentare të NATO-s dhe aleatët për mbështetjen e vazhdueshme ndaj Kosovës.