OBSH do të evakuojë 1,000 gra dhe fëmijë nga Gaza për kujdes urgjent mjekësor
Deri në 1,000 gra dhe fëmijë që kanë nevojë për kujdes mjekësor do të evakuohen së shpejti nga Gaza në Evropë, tha kreu i degës evropiane të Organizatës Botërore të Shëndetësisë (OBSH).
Evakuimet do të lehtësohen nga OBSH – agjencia shëndetësore e Kombeve të Bashkuara – dhe vendet evropiane të përfshira, tha Hans Kluge në një intervistë.
Hetuesit e OKB-së kanë thënë se Izraeli po synonte qëllimisht objektet shëndetësore në Gaza dhe po vriste dhe torturonte personelin mjekësor atje, duke e akuzuar vendin për “krime kundër njerëzimit”.
Rik Peeperkorn, përfaqësues i OBSH-së në territoret e pushtuara palestineze, tha në maj se rreth 10,000 njerëz kishin nevojë të evakuoheshin nga Gaza për kujdes urgjent mjekësor.
OBSH Evropa ka lehtësuar tashmë 600 evakuime mjekësore nga Gaza në shtatë vende evropiane që nga fillimi i luftës së fundit atje në tetor 2023.
“Kjo nuk do të kishte ndodhur kurrë nëse nuk do ta mbanim dialogun të hapur”, tha Kluge.
“E njëjta gjë [është e vërtetë] për Ukrainën”, shtoi ai. “Unë e mbaj dialogun të hapur me të gjithë partnerët.
“Tani, 15,000 pacientë me HIV-AIDS në Donbas, territoret e okupuara të Ukrainës po marrin medikamente për HIV-AIDS”, tha 55-vjeçari belg në anglisht, duke theksuar rëndësinë e “mospolitizimit të shëndetit”.
“Ilaçi më i rëndësishëm është paqja,” tha ai, duke vënë në dukje se punonjësit e kujdesit shëndetësor duhej të lejoheshin të bënin punën e tyre në zonat e konfliktit.
