Nipi i Nelson Mandelës thotë se do t’i bashkohet anijes së ndihmës për Gazën

Një nip i ikonës së luftës kundër aparteidit në Afrikën e Jugut, Nelson Mandela, ka njoftuar se do t’u bashkohet aktivistëve pro-palestinezë që synojnë të thyejnë bllokadën detare të Izraelit mbi Gazën me një anije ndihme nga Tunizia.

“Ne, si delegacion i Afrikës së Jugut, zgjodhëm posaçërisht që t’i bashkohemi Flotiljes Globale Sumud këtu në Tunizi, për të treguar nga një këndvështrim afrikan se Afrika është pjesë e kësaj lufte,” tha Mandla Mandela para gazetarëve në Tuniz.

“Si afrikanë, ne e dimë shumë mirë se çfarë do të thotë të jetosh nën okupim, nën shtypje,” shtoi ai.

Sipas organizatorëve, Flotilja Magreb Sumud do të niset të dielën, me synimin për t’iu bashkuar anijeve të tjera me destinacion Gazën që tashmë janë nisur nga Spanja dhe Italia.