Netanyahu udhëton drejt SHBA-së për bisedime rajonale me Trumpin, mes rritjes së frustrimit ndaj Izraelit

Kryeministri izraelit Benjamin Netanyahu po udhëton të dielën drejt Floridës për një takim me peshë të lartë me presidentin amerikan Donald Trump, sipas një raporti.

Vizita shënon takimin e gjashtë mes Netanyahut dhe Trumpit që nga janari dhe vjen në një kohë kur tensionet në rajon vazhdojnë të ziejnë.

Ndërsa Shtëpia e Bardhë nuk ka konfirmuar një orar të saktë për takimin, pritet që ai të zhvillohet të hënën në rezidencën Mar-a-Lago të Trumpit.

Udhëtimi i Netanyahut vjen në kohën kur administrata Trump dhe ndërmjetësuesit rajonalë po shtyjnë për kalimin në fazën e dytë të armëpushimit mes Izraelit dhe Hamasit në Gaza, një proces që po ecën ngadalë.

Koha e këtij takimi është “shumë domethënëse”, tha Gershon Baskin, bashkëkryetar i komisionit për ndërtimin e paqes të Aleancës për Dy Shtete, i cili ka marrë pjesë në negociata të fshehta me Hamasin.

“Faza e parë praktikisht ka përfunduar; ka mbetur një peng izraelit i vdekur, të cilin ata (Hamasi) po hasin vështirësi për ta gjetur,” i tha ai AFP-së.

Faza e dytë

Hamasi dhe Izraeli akuzojnë njëri-tjetrin për shkelje të shpeshta të armëpushimit, ndërsa ndërmjetësuesit kanë frikë se si Izraeli ashtu edhe Hamasi po zvarrisin procesin.

Faza e dytë do të parashihte tërheqjen e Izraelit nga pozicione kyçe në Gaza, marrjen e kontrollit nga një autoritet i përkohshëm palestinez dhe vendosjen e një Force Ndërkombëtare Stabilizimi.

Nga Hamasi pritet të dorëzojë armët, një pikë kyçe dhe shumë e kontestuar e procesit.

Media amerikane Axios raportoi, duke cituar zyrtarë të Shtëpisë së Bardhë, se bisedimet mund të hapin rrugën për një qeveri teknokrate palestineze në Gaza dhe vendosjen e Forcës Ndërkombëtare të Stabilizimit.

Po ashtu, u raportua se zyrtarë të lartë të administratës Trump po bëheshin gjithnjë e më të acaruar, “teksa Netanyahu ka ndërmarrë hapa për të minuar armëpushimin e brishtë dhe për të zvarritur procesin e paqes”.

“Ka gjithnjë e më shumë shenja se administrata amerikane po zhgënjehet me Netanyahun,” tha Yossi Mekelberg, ekspert i Lindjes së Mesme në think-tankun londinez Chatham House.

“Pyetja është se çfarë do të bëjë lidhur me këtë,” shtoi ai, “sepse faza e dytë aktualisht nuk po shkon askund.”

Vëzhguesit paralajmërojnë se çdo zvarritje mund të minojë stabilitetin rajonal dhe të dobësojë besimin ndërkombëtar në përpjekjet ndërmjetësuese të udhëhequra nga SHBA-ja.

Irani, Libani dhe Siria

Gazeta izraelite Yedioth Ahronoth raportoi të mërkurën se tema të tjera kyçe përfshijnë programin raketor të Iranit, marrëveshjet e sigurisë Izrael–Siri dhe rolin e Hezbollahut në Liban.

Netanyahu e ka kërcënuar Iranin me “një përgjigje shumë të ashpër” nëse ndërmerr ndonjë sulm ushtarak kundër Tel Avivit.

“Çdo veprim kundër Izraelit do të përballet me një përgjigje shumë të ashpër,” tha Netanyahu.

Tensionet mes Izraelit dhe Iranit janë përshkallëzuar ditët e fundit, mes akuzave izraelite se Teherani po përshpejton prodhimin e raketave balistike.

Izraeli ndërmori një sulm të paprovokuar ndaj Teheranit më 13 qershor, duke goditur objektiva ushtarake, bërthamore dhe civile, si dhe komandantë të lartë ushtarakë dhe shkencëtarë bërthamorë.

Ndërkohë, Izraeli dhe Libani ranë dakord për një armëpushim në nëntor 2024, pas më shumë se një viti përplasje kufitare që lanë mbi 4.000 të vdekur dhe 17.000 të plagosur.

Konflikti ishte i lidhur me luftën gjenocidale të Tel Avivit në Gaza, e cila nisi në tetor 2023.

Pavarësisht armëpushimit, Izraeli ka kryer gati 700 sulme ajrore në territorin libanez që nga 27 nëntori, duke vrarë të paktën 340 persona dhe duke plagosur mbi 940 të tjerë, sipas autoriteteve shëndetësore libaneze.

Forcat izraelite kanë kryer inkursione pothuajse të përditshme në jug të Sirisë javët e fundit, veçanërisht në provincën Quneitra, duke kryer arrestime, ngritur pika kontrolli dhe shkatërruar zona pyjore, veprime që kanë nxitur zemërim në rritje në mesin e banorëve lokalë.

Të dhënat e qeverisë siriane tregojnë se që nga dhjetori 2024, Izraeli ka kryer mbi 1.000 sulme ajrore në Siri dhe më shumë se 400 bastisje ndërkufitare në provincat jugore. /TRT World/