Netanyahu: SHBA dhe Izraeli do ta bëjnë Lindjen e Mesme “të Madhe sërish”
Kryeministri izraelit ka falënderuar presidentin amerikan pasi Donald Trump dënoi gjyqin për korrupsion që po zhvillohet ndaj Netanyahut.
“Faleminderit sërish, Donald Trump. Së bashku, do ta bëjmë Lindjen e Mesme të Madhe sërish!”, shkroi ai në platformën X.
Trump të shtunën sulmoi prokurorët në Izrael për çështjen e korrupsionit që përballet Netanyahu, duke thënë se SHBA-ja, e cila i ka dhënë Izraelit miliarda dollarë ndihmë, nuk do të “qëndrojë duarkryq ndaj kësaj”.
Netanyahu u akuzua në vitin 2019 në Izrael për ryshfet, mashtrim dhe shpërdorim besimi publik – akuza që ai i mohon. Gjyqi filloi në vitin 2020 dhe përfshin tre çështje penale.
Kryeministri izraelit është gjithashtu i kërkuar nga Gjykata Penale Ndërkombëtare për krime të supozuara lufte në Gaza, ku sulmet izraelite kanë vrarë më shumë se 56,000 njerëz që nga tetori 2023. Përveç kësaj, mijëra të tjerë janë vrarë në sulmet izraelite në Liban dhe Iran.
