Në hall për mesfushorë, Allegri merr lajmin e keq përpara Interit

Emergjencë në mesfushën e Juventusit. Max Allegri po përballet me mungesa të shumta në këtë repart, teksa së fundmi ka humbur edhe shërbimet e Fabio Mirettit.
20-vjeçari, i cili në “Artemio Franchi” realizoi golin e parë në Serie A dhe i dhuroi bardhezinjve fitoren ndaj Fiorentinës, ka braktisur grumbullimin me Italinë U21.

Miretti ka ndjerë dhimbje mesi dhe rrezikon derbin e Italisë kundër Interit. Juventusi pret zikaltrit e Simone Inzaghit në “Allianz Stadium” në datën 26 nëntor.
Problemet fizike të lojtarit të talentuar italian shqetësojnë jo pak teknikun Allegri përpara një prej ndeshjeve më të rëndësishme të sezonit. Gjithsesi, Miretti do i nënshtrohet kontrolleve mjekësore për të mësuar më shumë rreth kohës së rikuperimit. Me tifozët e “Zonjës” që shpresojnë që të mos jetë diçka serioze dhe futbollisti të jetë i gatshëm kundër Interit. /Supersport