Murtezani: Nuk kemi mik dhe mbështetës më të madh sesa Greqia në rrugën tonë drejt BE-së
Zëvendësministrja e Jashtme e Greqisë ka shprehur mirënjohje për mbështetjen e vazhdueshme që Greqia jep për politikën e zgjerimit, veçanërisht për anëtarësimin tonë në BE.
“Nuk kemi mik dhe mbështetës më të madh për integrimin tonë evropian sesa Greqia”, deklaroi ministri për Çështjet Evropiane, Orhan Murtezani, në një intervistë për MIA nga Athina, ku qëndroi për një vizitë dyditore në shtetin fqinj jugor. Ai u takua me zëvendësministren e Jashtme greke, Aleksandra Papadopulu, dhe me nënkryetarin e Parlamentit grek, njëherësh kryetar i Komisionit për Çështjet Evropiane, Ioanis Plakiotakis, duke theksuar se marrëdhëniet e mira fqinjësore janë një prioritet i përbashkët.
“Kjo miqësi duhet të forcohet më tej dhe marrëdhëniet e mira fqinjësore janë një prioritet i përbashkët që duhet të përforcohet. Ne jemi vende anëtare të NATO-s dhe krah për krah kontribuojmë për stabilitetin në rajon dhe në botë”, tha ai.
Ai shprehu mirënjohjen ndaj koleges së tij, zëvendësministres së Jashtme greke, për mbështetjen e vazhdueshme të Greqisë ndaj politikës së zgjerimit, veçanërisht për anëtarësimin tonë në BE.
“Me përgjegjësi mund të them se Maqedonia e Veriut nuk ka mik dhe mbështetës më të madh për integrimin tonë evropian sesa Greqia. Ne ndamë përvoja për mënyrat se si ta përshpejtojmë procesin, si të rrisim absorbimin e fondeve IPA dhe si të thellojmë bashkëpunimin dhe përvojat në instrumentet dhe fondet e tjera të Bashkimit Evropian”, tha ministri.
Me nënkryetarin e Parlamentit grek dhe kryetarin e Komisionit për Çështjet Evropiane, ata diskutuan mundësinë e forcimit të komunikimit mes parlamenteve të të dyja vendeve dhe shkëmbyen mendime mbi proceset dypalëshe që janë pjesë e procedurës parlamentare.
“Diskutuam edhe për zbatimin e ndërsjellë të Marrëveshjes së Prespës dhe arritëm në përfundimin se të dyja palët duhet të përmirësojnë aktivitetet koordinuese dhe përpjekjet për zbatimin e mëtejshëm të marrëveshjes”, tha Murtezani.
Në takim u diskutua edhe çështja e tre memorandumeve të bashkëpunimit, të cilat ende nuk janë ratifikuar nga deputetët grekë.
Murtezani mbërriti në Athinë nga Brukseli, ku zhvilloi një takim me komisioneren evropiane për zgjerimin, Marta Kos, ku në fokus të bisedimeve ishte agjenda reformuese e vendit dhe Plani i Rritjes për Ballkanin Perëndimor.
