MPB do ta sanksionojë ashpër gjuhën e urrejtjes, në tribuna ka vend vetëm për tifozëri sportive
Ministria e Punëve të Brendshme vazhdimisht apelon te të gjithë qytetarët dhe anëtarët e grupeve të tifozëve që të mbështesin klubet e tyre sportive, por të bëjnë tifozëri në mënyrë sportive, ekskluzivisht në frymë sportive, pa gjuhë urrejtjeje dhe pa ofendime të çfarëdo lloji – qofshin ato personale, etnike, fetare apo të ndonjë përkatësie tjetër – të cilat nuk janë të përshtatshme për garat sportive dhe janë në kundërshtim me ligjin.
Në këtë kontekst, MPB edhe njëherë thekson se në kuadër të sigurimit të zhvillimit të qetë dhe pa pengesa të ndeshjeve sportive, si në të kaluarën, ashtu edhe tani e në të ardhmen, policia do të jetë jashtëzakonisht rigoroze ndaj çdo çrregullimi të rendit dhe qetësisë publike, përkatësisht ndaj çdo brohoritjeje fyese apo mënyre tjetër të përhapjes së gjuhës së urrejtjes.
Për kujtesë, në lidhje me ndeshjen e basketbollit që u mbajt më 02.08.2025 në sallën sportive në Kumanovë, në SPB Kumanovë tashmë janë thirrur disa persona të dyshuar me të cilët është zhvilluar bisedë zyrtare, dhe pas analizave të kryera në koordinim me Prokurorinë Themelore Publike të Kumanovës do të ndërmerren masa konkrete ligjore – ndërkohë që një person është privuar nga liria dhe ndaj tij do të parashtrohet kallëzim përkatës.
Sa i përket ndeshjes së futbollit që u zhvillua në arenën “Todor Proeski” në Shkup më 05.08.2025, SPB Shkup në bazë të materialit të incizuar dhe të dokumentuar po ndërmerr masa në koordinim me prokurorin publik kompetent. Përkatësisht, një njoftim me shkrim është dorëzuar në Prokurori mbi bazën e materialit tashmë të konstatuar, pas së cilës MPB do të veprojë në përputhje me kompetencat e saj dhe në koordinim me Prokurorinë, dhe për çdo shkelje ligjore të konstatuar do të ndërmerren kallëzimet përkatëse, për çka opinioni publik do të informohet në kohë.
