Ministri gjerman i Mbrojtjes: Nëse Putin sulmon, ne duhet të jemi të aftë për të bërë luftë
Forcat gjermane duhet të jenë gati për luftë, që do të thotë se nevojiten më shumë shpenzime, tha ministri gjerman i Mbrojtjes Boris Pistorius në një intervistë për grupin mediatik Funke .
“Ne kemi nevojë për një buxhet të mbrojtjes më tepër se 90 miliardë euro në vit nga viti 2028 e tutje për të përmbushur kërkesat që kemi për shkak të situatës së shtrënguar të sigurisë ,” tha Pistorius.
Pistorius përmendi në mënyrë specifike presidentin rus Vladimir Putin, i cili ka zhvilluar një luftë agresioni kundër Ukrainës për gati tre vjet dhe ka kërcënuar të sulmojë aleatët që po mbështesin Kievin në përpjekjet e tij për të mbrojtur veten.
“Nëse Putin sulmon , ne duhet të jemi të aftë për të bërë luftë ,” tha Pistorius në intervistën e botuar të shtunën.
Komentet e ministrit vijnë mes një shtytje për anëtarët e NATO-s për të rritur shpenzimet e tyre të mbrojtjes, me Sekretarin e ri të Përgjithshëm të NATO-s, Mark Rutte, duke thënë se anëtarët e aleancës duhet të shpenzojnë “shumë më shumë” për mbrojtjen sesa objektivi aktual prej 2 përqind të prodhimit të brendshëm bruto.
Presidenti i sapozgjedhur i SHBA-së, Donald Trump thuhet se u ka thënë zyrtarëve evropianë se dëshiron që aleatët e NATO-s të shpenzojnë 5 për qind të PBB-së për mbrojtjen.
Për të siguruar një rritje të tillë buxhetore , Pistorious tha se do të favorizonte një reformë të frenimit të borxhit të Gjermanisë , e cila vendos një kufi kushtetues në deficitin buxhetor.
“Unë mendoj se është politikisht e gabuar t’i përmbahemi rreptësisht frenimit të borxhit në këtë situatë,” tha Pistorius. “Nëse ne financojmë shpenzimet e nevojshme për mbrojtjen tonë nga buxheti normal, kjo mbyt aftësinë e shtetit për të vepruar , rrezikon sigurinë shoqërore dhe kështu forcon partitë ekstremiste.”
Frena e borxhit, e cila u shkrua në kushtetutë nga kancelarja e atëhershme Angela Merkel në 2009, kufizon deficitin strukturor buxhetor në 0.35 për qind të PBB-së në kohë normale. Është kritikuar gjithnjë e më shumë se nuk është në harmoni me realitetet moderne.
Pistorius foli gjithashtu në favor të pjesëmarrjes së Gjermanisë në një përpjekje evropiane për të dërguar paqeruajtës në Ukrainë – por theksoi se një plan i tillë mund të zbatohet vetëm pasi të përfundojë lufta .
