Mickoski: Inspektorët po analizojnë çmimet e larta nëpër supermarkete pas bojkotit qytetar
Kryeministri Hristijan Mickoski deklaroi sot se inspektorët janë në terren në të gjitha supermarketet kryesore duke kryer një analizë të detajuar për rritjen e vazhdueshme të çmimeve të produkteve ushqimore bazë. Sipas tij, shqetësimet e ngritura për çmimet e larta janë të vërteta, ndërsa më shumë detaje do të publikohen të hënën.
“Institucionet kanë dalë në terren dhe po bëjnë një analizë të detajuar në të gjitha supermarketet e mëdha. Më shumë informacione do të ndahen të hënën, por ajo që mund të them tani është se shqetësimet tona po bëhen realitet. Ne do të veprojmë dhe do të vazhdojmë të veprojmë, pasi si qeveri kemi për detyrë të mbrojmë standardin e qytetarëve,” deklaroi Mickoski gjatë një ngjarjeje në Koçan, ku u shpërndanë çelësat e ndërtesës së re për familjet në nevojë.
Ai theksoi se qeveria do të mbajë ekuilibrin mes mbrojtjes së konsumatorëve dhe ruajtjes së parimeve të ekonomisë së tregut, duke kërkuar bashkëpunim nga të gjitha palët për një zgjidhje të përbashkët.
Mickoski gjithashtu njoftoi se deri në fund të qershorit do të vihet gurthemeli i një parku me erë që do të shtrihet në tri komuna – Shtip, Karbincë dhe Radovish – një investim prej afërsisht gjysmë miliardi dollarësh.
Bojkoti i supermarketeve tregon pakënaqësinë e qytetarëve
Një bojkot i madh i supermarketeve u mbajt dje për herë të parë në vend si protestë ndaj rritjes së çmimeve të produkteve ushqimore bazë. Kjo bëri që shumica e marketeve të ishin thuajse bosh, ndërsa pati një ulje të ndjeshme të blerjeve edhe në dyqanet më të vogla dhe tregjet. Informacionet mbi ndikimin në xhiron e tregtarëve priten nga Drejtoria e të Ardhurave Publike.
Kryetari i Odës Ekonomike, Branko Azeski, e mbështeti bojkotin, por theksoi se dialogu mes prodhuesve dhe shitësve është mënyra e vetme për të zgjidhur problemin e çmimeve të larta. “Ne do të veprojmë me përgjegjësi dhe do të punojmë me qeverinë dhe palët e tjera të interesuara për të gjetur një zgjidhje,” tha Azeski.
Ministrja e Financave, Gordana Dimitrieska-Koçoska, bëri thirrje që të respektohet Ligji për praktikat e padrejta tregtare dhe të mos abuzohet me situatën. Ajo tha se për shkak të kapaciteteve të kufizuara, inspektorët nuk kanë mundur të dalin më herët në terren, por po punohet për përforcimin e kontrolleve.
Bojkoti i djeshëm u organizua përmes rrjeteve sociale, duke ndjekur shembullin e Kroacisë dhe disa vendeve të tjera.
Rritja e kostos së jetesës dhe premtimi për transparencë
Sipas Lidhjes së Sindikatave të Maqedonisë, shpenzimet minimale për një familje katër anëtarëshe në janar u rritën me 391 denarë krahasuar me dhjetorin. Kostoja e ushqimeve dhe pijeve u rrit me 123 denarë, ndërsa vlera e shportës sindikale u rrit me 6.089 denarë brenda një viti, një rritje prej 10.63%.
Mickoski ka premtuar se të hënën, në mbledhjen e Këshillit Ekonomiko-Social, do të prezantojë “çmimet reale” të produkteve bazë, duke akuzuar ish-funksionarët e LSDM-së për manipulime në llogaritjet e mëparshme.
Ndërkohë, të dhënat tregojnë se kostoja e jetesës në dhjetor 2024, krahasuar me dhjetorin e vitit të kaluar, është rritur me 4.4%, ndërsa çmimet me pakicë janë rritur me 4.3%.
