Mexhiti: Akademia Shqiptare e Shkencave dhe Arteve nuk është kërcënim
Zv/kryeministri, Izet Mexhiti vlerëson se ideja për Akademinë Shqiptare të Shkencave dhe Arteve është rezultat i evoluimit të shoqërisë në RMV. Sipas tij, për këtë arsye kjo nismë nuk duhet të shihet si kërcënim.
“Maqedonia e Veriut ka shansin unikal për t’u organizuar si një shoqëri funksionale multikulturore dhe për t’i kthyer temat që deri dje na kanë ndarë, në kualitete që do të na bashkojnë në të ardhmen tonë evropiane. Sfera hulumtuese shkencore nuk guxon të jetë peng i ngarkesave nga e kaluara dhe i animoziteteve që kanë karakterizuar nënqiellin tonë për shekuj me radhë“, ka shkruar Mexhiti.
Akademitë e shkencave në vendet e zhvilluara, vlerëson ai, mision themelor e kanë kërkimin shkencor si kontribut për zhvillimin e njerëzimit. Akademitë e shkencave në vendet e Ballkanit ngjasojnë në bunkerë të ndërtuar në shekullin 19 dhe janë ende mjaft rigjide për t’i zëvendësuar vlerat nacional romantike me vlerat e kohës së re, thotë Mexhiti.
“Argumenti i vetëm kundër Akademisë Shqiptare është pretendimi se shkenca nuk njeh përkatësi etnike dhe nuk guxon të ndikohet nga politika. Atëherë, cili ishte kontributi shkencor dhe cilat ishin argumentat shkencore në Pamfletin e Akademisë Maqedonase të Shkencave dhe Arteve kur në vitin 2001 propozoi ndarjen e Maqedonisë?! Të mos flasim për pamfletet fatkeqe të Akademisë Serbe te shek.19 që thirrnin në krijimin e shteteve të pastra dhe shpërnguljen e organizuar të joserbëve nga territori i shtetit serb! A është kjo fryma shkencore për të cilën sot flasin të gjithë kundërshtuesit e idesë sonë?”, pyet Mexhiti.
Sa për dilemat rreth formës së organizimit, mënyrës së financimit apo mbështetjes, ai vlerëson se duhet të marrim si shembull financimin e Akademisë Evropiane të Shkencave dhe Arteve. Kjo Akademi, mes tjerash, definohet si organizatë jofitimprurëse që financohet edhe nga pushteti lokal.
“Për ata që do të kundërshtojnë, i kujtoj se në mesin e anëtarëve të kesaj Akademie është edhe ish presidenti i vendit tonë Gjorge Ivanov”, shton Mexhiti.
Sipas tij, Akademia nuk është kërcënim por mundësi! “Krejt çka na nevojitet për ta parë në këtë dritë është demistifikimi dhe të menduarit jashtë kornizave që na bëjnë pengje të së shkuarës”, përfundin Mexhiti.
