Kuvendi përkujton viktimat e Srebrenicës, Gashi: E vërteta duhet të mbetet gjallë!

Kryetari i Kuvendit, Afrim Gashi, ka njoftuar se me rastin e 11 Korrikut, Ditës Ndërkombëtare të Përkujtimit të Gjenocidit në Srebrenicë në Kuvend, kanë nderuar më shumë se 8 000 viktima të pafajshme.
“Me rastin e 11 Korrikut – Ditës Ndërkombëtare të Përkujtimit të Gjenocidit në Srebrenicë, sot, në përvjetorin e 30-të, në Kuvend nderuam më shumë se 8.000 viktima të pafajshme. Si Kryetar i Kuvendit, e theksoj obligimin tonë që e vërteta të mbetet e gjallë, ndërsa drejtësia të jetë udhërrëfyes në veprimet tona. Nuk ka vend për mohimin apo harresën, e ardhmja jonë duhet të ndërtohet mbi respektin, tolerancën dhe dinjitetin njerëzor.
Jemi të përkushtuar t’i edukojmë gjeneratat e ardhshme për tmerret e gjenocidit, në mënyrë që të ruajmë njerëzinë dhe të parandalojmë përsëritjen e krimeve të tilla. Le të bëhen solidariteti dhe përgjegjësia ndaj të pambrojturve motivi ynë i përbashkët”, ka shkruar kryetari i Kuvendit, Afrim Gashi.