Kurthi fatal: Katër ushtarë izraelitë, mes tyre një komandant elitë vriten në Rafah
Katër ushtarë të izraelit humbën jetën dhe tre të tjerë u plagosën rëndë nga një shpërthim në Rafah, në jug të Rripit të Gazës.
Shpërthimi ndodhi kur një automjet Hummer i ushtrisë izraelite goditi një bombë të vendosur në rrugë. Midis të vdekurve ishte Major Omri Chai Ben Moshe, një komandant me përvojë i njësisë “Dekel”, i cili ishte i njohur për aftësitë e tij ushtarake dhe angazhimin ndaj shokëve të tij. Po ashtu, humbën jetën edhe tre togerë të rinj, të cilët shërbenin në njësitë elitare si Brigada Golani, Brigada Komando dhe Sayeret Matkal.
Ata ishin pjesë e Shkollës së Trajnimit të Oficerëve dhe kishin filluar karrierën e tyre ushtarake me shumë përkushtim. Sulmi ndodhi në një zonë që kontrollohej më parë nga IDF, e cila është përpjekur të sigurojë territorin me metoda të ndryshme, përfshirë patrullime dhe përdorimin e teknologjive për zbulimin e eksplozivëve.
Sidoqoftë, Hamasi vazhdon të përdorë taktika të rrezikshme me shpërthyes të improvizuar. Ngjarja ka ndodhur në një periudhë të tensionuar mes përplasjeve midis forcave izraelite dhe grupeve palestineze.
