Kuba i përgjigjet kërcënimit të Trumpit: Askush nuk mund të na tregojë çfarë të bëjmë

Presidenti i Kubës, Miguel Díaz-Canel, ka hedhur poshtë kërcënimin e presidentit amerikan Donald Trump ndaj vendit të tij, duke u zotuar se do ta mbrojë Kubën pas rrëmbimit nga Uashingtoni të udhëheqësit të aleatit të saj, Venezuelës.

“Kuba është një shtet i lirë, i pavarur dhe sovran. Askush nuk na tregon çfarë të bëjmë”, shkroi Díaz-Canel të dielën në platformën X, duke shtuar se ishulli karaibian është “gati të mbrojë atdheun deri në pikën e fundit të gjakut”.

Një reagim erdhi edhe nga ministri i Jashtëm i Kubës, Bruno Rodríguez, i cili tha se vendi nuk ka marrë kompensim për shërbime sigurie të ofruara për ndonjë shtet tjetër, sipas një postimi në X.

Ai shtoi se Kuba ka të drejtë të importojë karburant nga çdo vend që është i gatshëm ta eksportojë. Historikisht, Kuba ka importuar pjesën më të madhe të karburantit nga Venezuela dhe Meksika.

Rodríguez akuzoi Shtetet e Bashkuara për sjellje “kriminale” që kërcënon paqen globale.

Gjuha provokuese e Trumpit ndaj Kubës vjen në një kohë kur udhëheqësi amerikan, i inkurajuar pas rrëmbimit të Madurós, ka lënë të kuptohet se ka edhe vende të tjera në shënjestër.

Trump, i cili kishte kërkuar hapur Çmimin Nobel për Paqe vitin e kaluar, së fundmi ka kërcënuar Kolumbinë, Meksikën, Iranin dhe Groenlandën.

Disa ligjvënës republikanë amerikanë të dielën e përgëzuan Trumpin për komentet e tij agresive ndaj Kubës, përfshirë Mario Díaz-Balart, kongresmen nga Florida.

“Po dëshmojmë atë që jam i bindur se do të jetë fillimi i fundit të regjimit në Havanë”, shkroi Díaz-Balart në spanjisht në X.

“Tirania në Kubë nuk do t’i mbijetojë mandatit të dytë të presidentit Trump dhe Kuba më në fund do të jetë e lirë pas dekadash mjerimi, tragjedie dhe dhimbjeje.” /TRT World/