Kryeprokurori i Kosovës i përgjigjet Kurtit: “Kryeministrit nuk i merret dëshmia në zyrë”

Kreu i Prokurorisë Speciale të Kosovës Blerim Isufaj në konferencën e thirrur këtë të hënë kërkoi nga Qeveria që të tregojë përkushtim ndaj sundimit të ligjit dhe të shmangë retorikën që synon politizimin e drejtësisë.

“Ligji është i njëjtë për të gjithë qytetarët e Republikës së Kosovës, përfshirë edhe zyrtarët e lartë shtetërorë. Ftesa për të dëshmuar është procedurë e rregullt dhe çdo person që thirret ka përgjegjësi ligjore të bashkëpunojë me drejtësinë. U bëj thirrje të gjitha institucioneve, përfshirë edhe Qeverinë e Kosovës që të tregojë përkushtim ndaj sundimit të ligjit dhe të shmangin retorikën që synon politizimin e drejtësisë,” deklaroi z. Isufaj.

Kreu i Prokurorisë Speciale shtoi se gjatë detyrës së tij nuk ka ndodhur ndonjëherë që dikush të jetë marrë në pyetje në Zyrën e Kryeministrit, ashtu siç po kërkon kreu i qeverisë.

“Unë nuk kam informacione nëse ndokush ndonjëherë është intervistuar në zyrën e Kryeministrit, ndoshta edhe mund të ketë, por unë nuk e di. Në këto pesë vjet sa jam kryeprokuror i kësaj prokurorie, raste të tilla nuk ka pasur. Deklaratat denigruese dhe fyerjet ndaj prokurorëve dhe Prokurorisë jo vetëm që minojnë integritetin dhe sistemin e drejtësisë, por e cenojnë edhe besimin e publikut në sundimin e ligjit,” tha kryeprokurori.

Kryeministri Albin Kurti tha të dielën se Isufaj është regjisori i një pamjeje ku duhet të prodhohet një lajm se kryeministri i Kosovës po merret ne pyetje për një rast korrupsioni.

Kurti nuk iu përgjigj më 16 dhjetor ftesës së Prokurorisë Speciale për të dhënë dëshminë lidhur me hetimet mbi rezervat shtetërore.