Kryeparlamentari Gashi në Ditën e Alfabetit në SHFK “22 Nëntori”: Gjallëria e fëmijëve na kujton sa i shenjtë është rrugëtimi ynë për gjuhën
Kryetari i Kuvendit, Afrim Gashi, ka marrë pjesë sot në manifestimin e Ditës së Alfabetit në SHFK “22 Nëntori”, një ngjarje të cilën ai e ka përjetuar me emocione të veçanta, duke rikujtuar rëndësinë historike dhe shpirtërore të gjuhës shqipe.
“Pata nderin të marr pjesë në manifestimin e ditës së Alfabetit të SHFK ‘22 Nëntori’. Gjallëria në performancat e fëmijëve për alfabetin tonë, më kujtuan edhe njëherë se sa i shenjtë është rrugëtimi ynë për ruajtjen e gjuhës dhe dashurisë për atdheun”, ka deklaruar Gashi.
Kryeparlamentari vlerësoi me emocion të veçantë faktin se shkolla ku ai vetë ka nisur hapat e parë drejt dijes, këtë vit ka marrë një emër të ri simbolik, në përputhje me festën e alfabetit.
“Emocion i veçantë që shkolla ku kam hedhur hapat e mi të parë drejt dijes, këtë vit mban një emër të ri, të ngarkuar me simbolikën dhe krenarinë e kësaj feste”, theksoi ai.
Gashi shtoi se edukimi i gjeneratave të reja në frymën e gjuhës amtare dhe historisë së saj mbetet themel i identitetit dhe i vazhdimësisë kombëtare.
Manifestimi u mbyll me aktivitete kulturore të nxënësve, të cilët përmes recitimeve dhe interpretimit të këngëve kushtuar alfabetit, krijuan një atmosferë festive dhe domethënëse.
