Kryediplomati amerikan: Duhet të ndalet mbështetja me armë për RSF-në në Sudan
Sekretari i Shtetit i SHBA-së, Marco Rubio, tha se mbështetja me armë për Forcat e Mbështetjes së Shpejtë (RSF), të cilat vazhdojnë sulmet e tyre në Sudan, duhet të ndalet, transmeton Anadolu.
Rubio foli me gazetarët pas Takimit të Ministrave të Jashtëm të G7 të mbajtur në Niagara Falls, Kanada.
Duke i përshkruar ngjarjet në Sudan si “të tmerrshme”, Rubio tha se ata po punojnë me Egjiptin, Arabinë Saudite dhe Emiratet e Bashkuara Arabe për këtë çështje dhe po “ushtrojnë presion mbi palët përkatëse”.
“Duhet të ndalet kjo mbështetje (e armëve). Është e qartë se RSF-ja po merr ndihmë të huaj dhe është e qartë se kjo ndihmë nuk vjen vetëm nga një vend financues. Në të njëjtën kohë, disa vende po lejojnë që territori i tyre të përdoret për dërgesën dhe transportimin e kësaj ndihme”, deklaroi Rubio, duke vënë në dukje se nuk dëshiron të shënjestrojë drejtpërdrejt asnjë vend në këtë drejtim.
Gjithashtu sekretari Rubio mbrojti idenë se nuk janë të vërteta lajmet në drejtimin që Britania ka ndaluar ndarjen e inteligjencës me Washingtonin për shkak të shqetësimeve në lidhje me sulmet e SHBA-së ndaj “anijeve të dyshuara të drogës” në Karaibe.
Kur u pyet në lidhje me pretendimet në Evropë se këto sulme mund të shkelin të drejtën ndërkombëtare, Rubio tha se “Nuk mendoj se Bashkimi Evropian ka autoritetin për të vendosur se çfarë është e drejta ndërkombëtare”.
