Kreu i një OJQ-je kërkon “qasje të vërtetë” në Gaza dhe fund të skemave të militarizuara

Jan Egeland, drejtuesi i Këshillit Norvegjez për Refugjatët (NRC), ka hedhur poshtë komentet e fundit të shefit të politikës së jashtme të BE-së, e cila deklaroi se blloku kishte vërejtur “disa shenja pozitive” sa i përket shpërndarjes së ndihmës në Gaza.

Kaja Kallas u tha gazetarëve këtë javë se ato “shenja pozitive” përfshijnë “më shumë kamionë që hyjnë” në enklavën e bombarduar.

“Por për NRC-në dhe shumë të tjerë, asnjë ndihmë nuk ka hyrë prej 142 ditësh. Asnjë kamion. Asnjë dërgesë,” shkroi Egeland në X, duke theksuar se 85 përqind e kamionëve me ndihma nuk arrijnë kurrë në destinacionin e tyre për shkak të grabitjeve ose pengesave të tjera të shkaktuara nga kriza e urisë në Gaza.

Ai shtoi se familjet palestineze po mbijetojnë me vetëm një “vakt me cilësi të dobët” në ditë – nëse arrijnë ta kenë – ndërkohë që skema e ndihmës e Fondacionit Humanitar të Gazës, e mbështetur nga SHBA-ja dhe Izraeli, e ka shndërruar ndihmën në një situatë të rrezikshme dhe vdekjeprurëse.

“Të quash këtë ‘shenjë pozitive’ nuk është vetëm mashtruese, por minon realitetin me të cilin përballen punonjësit humanitarë dhe civilët çdo ditë. Donatorët dhe diplomatët duhet të kërkojnë qasje reale: garanci sigurie, hyrje të plotë dhe fund të shpërndarjeve të militarizuara,” tha Egeland.

“Kjo nuk është përparim. Është dështim i maskuar.” /Al Jazeera/