Konfiskim masiv marijuane: Aksioni hyn në ditën e dytë me 18 tonë në Strumicë

Pasi dje u sekuestruan rreth nëntë tonë marijuanë nga ambientet e një kompanie në Shkup, Ministria e Punëve të Brendshme dhe Prokuroria për Ndjekjen e Krimit të Organizuar dhe Korrupsionit po vazhdojnë edhe sot aktivitetet në terren, kësaj here në rajonin e Strumicës. Siç raportoi më herët “Skopje1”, atje po konfiskohen rreth 18 tonët e mbetura të marijuanës, duke e çuar sasinë totale të përfshirë në aksion në rreth 27 tonë.

Nga Ministria e Punëve të Brendshme për “Skopje1” konfirmojnë se aksioni është në vazhdim, por pa zbuluar detaje. “Aktivitetet në lidhje me aksionin për të cilin po pyesni janë ende në zhvillim dhe për këtë arsye nuk jemi në gjendje të ndajmë informacione shtesë. Pas përfundimit të plotë të aksionit, publiku do të informohet në mënyrë të duhur”, thonë nga MPB.

Qëndrim të ngjashëm ka edhe Prokuroria për Ndjekjen e Krimit të Organizuar dhe Korrupsionit, nga ku theksojnë se për shkak se veprimet në terren janë ende duke vazhduar, në këtë moment nuk mund të ndajnë më shumë informacione me publikun.

Aksioni në Maqedoni vjen pas ngjarjeve të disa ditëve më parë në Serbi, kur autoritetet atje sekuestruan rreth pesë tonë marijuanë, për të cilat zyrtarisht u njoftua se ishin kontrabanduar nga Maqedonia dhe ishin të destinuara për tregun serb. Pikërisht ky konfiskim hapi hetimin për një rrjet më të gjerë kriminal, pas së cilës institucionet maqedonase nisën një aksion të koordinuar në disa lokacione në vend.

Autoritetet njoftojnë se publiku do të informohet në detaje pas përfundimit të plotë të kontrolleve dhe veprimeve hetimore, kur pritet edhe konfirmimi zyrtar për sasinë përfundimtare të drogës së sekuestruar dhe personat e mundshëm të dyshuar.