Kina: Bisedimet SHBA-Iran mund të shmangin viktima tjera dhe të normalizojnë Ngushticën e Hormuzit
Ministri i Jashtëm kinez, Wang Yi tha sot se bisedimet midis SHBA-së dhe Iranit mund të shmangin humbjet e mëtejshme të jetëve dhe të ndihmojnë në normalizimin e lundrimit në Ngushticën e Hormuzit, duke mbështetur rolin e Pakistanit në negociata, transmeton Anadolu.
Komentet e tij erdhën gjatë një telefonate me ministrin e Jashtëm pakistanez, Ishaq Dar.
Wang theksoi se dialogu është e vetmja mënyrë për të parandaluar viktima të mëtejshme, për të ndaluar përhapjen e konfliktit dhe për të rivendosur lundrimin normal në Ngushticën e Hormuzit, sipas Ministrisë së Jashtme të Pekinit.
Ai vlerësoi përpjekjet e Pakistanit për të ulur tensionet dhe për të ndërmjetësuar.
Pakistani të enjten konfirmoi rolin e tij të drejtpërdrejtë në transmetimin e mesazheve midis SHBA-së dhe Iranit drejt përfundimit të luftës. “Ne riafirmuam nevojën për të rivendosur paqen dhe stabilitetin në Lindjen e Mesme dhe në rajonin më të gjerë”, tha Dar në kompaninë amerikane të mediave sociale X.
“Palët ranë dakord të vazhdojnë përpjekjet e tyre për të zgjidhur të gjitha mosmarrëveshjet përmes dialogut dhe diplomacisë”, shtoi kryediplomati pakistanez.
Përshkallëzimi rajonal ka vazhduar të rritet që kur SHBA-ja dhe Izraeli nisën ofensivë të përbashkët ndaj Iranit më 28 shkurt, duke vrarë deri më tani mbi 1.340 njerëz, përfshirë ish-liderin suprem Ali Khamenei.
Teherani është kundërpërgjigjur me valë sulmesh me dronë dhe raketa që kanë shënjestruar Izraelin, Jordaninë, Irakun dhe vendet e Gjirit që strehojnë asete ushtarake amerikane, duke shkaktuar viktima dhe dëme në infrastrukturë ndërsa kanë prishur tregjet dhe aviacionin global.
