Karvani i qëndresës arriti më shumë se qëllimet e tij

Ata që planifikuan lëvizjen e popujve drejt Gazës nuk kishin bindjen se do të hynin në Gaza, por synonin të izolonin entitetin sionist në arenën ndërkombëtare – si një strategji thelbësore në përballjen gjithëpërfshirëse me sionizmin. Ata kërkonin çdo port në vendet arabe prej nga mund të niseshin anijet drejt Gazës, në mënyrë që përballja të ishte vetëm me entitetin. Por nuk gjetën – po, nuk gjetën asnjë vend arab që të sfidonte entitetin dhe Amerikën duke lejuar këtë. Kështu lindi ideja e karvaneve tokësore drejt Gazës, dhe nderi i përket Magrebit për këtë arritje madhështore. Rezultatet tejkaluan pritshmëritë, shumëfish më tepër se ç’pritej. Ja disa nga të vërtetat që dëshmoi Karvani i Qëndresës:

• Populli palestinez ndjeu se nuk është vetëm, dhe se popujt arabë, myslimanë dhe të lirë nëpër botë nuk do t’i braktisin. Ata do të vazhdojnë të shpikin mënyra të reja për t’i ndihmuar, duke ngritur moralin e tyre, duke rritur qëndresën dhe duke fuqizuar negociatorët që flasin në emër të tyre për të drejtën palestineze.

• U rrit ndjeshëm vetëdija ndërkombëtare në favor të Palestinës, gjë që u dëshmua nga anija “Madeleine” dhe delegacionet e huaja nga e gjithë bota që udhëtuan në Kajro për t’u bashkuar me karvanin.

• Gjendja e panikut që përfshiu udhëheqësit e entitetit, saqë u detyruan t’i luteshin aleatit të tyre egjiptian që ta ndalonte karvanin në vend të tyre – një imazh tronditës që ua kujton fundin e afërt, posa popujt të çlirohen nga tirania.

• Sot, problemi i tiranisë është me popujt, pasi ajo ka arritur të largojë nga skena vepruese lëvizjet dhe partitë islame. Ata që nisën karvanin në Tunizi dhe ata që erdhën nga e gjithë bota nuk ishin islamistë; madje as ata islamistë që ndihmuan në organizim nuk vepruan me vendime të partive të tyre.

• Ideja e një rryme popullore që do ta çlirojë umetin dhe botën nga tirania është tashmë duke u kristalizuar, siç e kemi parashikuar, dhe asgjë nuk mund ta ndalë.

• Populli i Magrebit është një trup i vetëm dhe bashkimi i tij është një realitet shoqëror i pashmangshëm, sado të vonohet. Garant i këtij bashkimi janë vetë popujt, në fund të fundit.

• Kufijtë që pengojnë unitetin, solidaritetin dhe bashkëpunimin në umet janë si burgje vrastare, si lëkurë pa pore – e cila kalbet nëse nuk hapen poret. Karvani i qëndresës ishte një operacion kirurgjik që hapi disa nga këto pore.

• Ajo që pengon ndihmën për Gazën dhe çlirimin e Palestinës janë pikërisht ato kufij të mbyllur. Karvani dëshmoi se popujt janë të gatshëm të lëvizin drejt Gazës me logjikë të matur dhe emocione të fuqishme, posa t’u lejohet kalimi.

• Rrethimi i vërtetë që e zgjat vuajtjen e Gazës dhe e mban të pushtuar Palestinën është rrethimi nga vendet kufitare – veçanërisht Egjipti dhe Jordania. E drejtë ka kush ka thënë: “Kufijtë e entitetit janë aty ku ndalen karvanët e thyerjes së rrethimit dhe shtypen shpërthimet e popujve drejt Palestinës.”

• Udhëheqësit e Egjiptit humbën një mundësi historike për të përgënjeshtruar atë që popujt thonë për ta – se janë agjentë të entitetit sionist dhe se e kanë shitur Palestinën për dollarë, ndihma amerikane, vendeve të gjirit dhe kosto të tjera. Sot janë në imazhin më të turpshëm që ka pasur ndonjëherë një udhëheqës arab në histori.

• Karvani i qëndresës tregoi se nëse ka një vend që ka përparësi në formësimin e vetëdijes, ai është toka e Egjiptit – populli dhe elita e tij. Kur zgjohet Egjipti, zgjohet i gjithë umeti.

• Ky karvan i dha mundësinë secilit që mori pjesë në të, e mbështeti apo dëshironte suksesin e tij, të kuptojë se ka mënyra të ndershme për të arritur nderin – me mbështetje te Zoti, sinqeritet, guxim, qëndrueshmëri në parime, sakrificë, lënien mënjanë të llogaritjeve dhe vendimeve burokratike, dhe pa frikë nga tirania apo etje për të.

Dr. Abdurezak Makri