Izraeli vret 73 palestinezë, kryesisht gra dhe fëmijë, në Beit Lahia të Gazës veriore

Të paktën 73 palestinezë u vranë dhe dhjetëra u plagosën në sulmet ajrore izraelite që synuan një bllok banimi në qytetin Beit Lahia në veri të Rripit të Gazës, tha të shtunën Zyra e Medias e enklavës, transmeton Anadolu.

Ushtria kreu “një masakër të tmerrshme që deri më tani ka marrë jetën e 73 martirëve dhe ka lënë dhjetëra të plagosur dhe të zhdukur, shumica e të cilëve janë fëmijë dhe gra, pasi bombardoi nga ajri zona të banuara me popullsi të dendur”, thuhet në një deklaratë të zyrës.

“Ushtria okupatore izraelite vazhdon fushatën e saj të qartë të spastrimit etnik, shfarosjes dhe gjenocidit, këtë herë në Beit Lahia në veri të Rripit të Gazës”, shtoi ajo.

Për të 15-ën ditë radhazi, ushtria izraelite ka vazhduar ofensivën e saj në veri të Gazës.

Gaza veriore është nën një rrethim paralizues dhe bombardime të vazhdueshme, me shtëpitë që janë shkatërruar mbi banorët e tyre.

Izraeli ka vazhduar ofensivën brutale në Gaza që nga tetori i vitit të kaluar, pavarësisht nga një rezolutë e Këshillit të Sigurimit të OKB-së që bën thirrje për armëpushim të menjëhershëm.

Më shumë se 42.500 njerëz janë vrarë që atëherë, kryesisht gra dhe fëmijë, dhe rreth 99.700 janë plagosur, sipas autoriteteve lokale shëndetësore.

Sulmet izraelite kanë zhvendosur pothuajse gjithë popullsinë e Gazës, krahas bllokadës së vazhdueshme që ka çuar në mungesa të mëdha të ushqimit, ujit të pastër dhe ilaçeve.

Izraeli përballet me akuza për gjenocid në Gjykatën Ndërkombëtare të Drejtësisë për veprimet e tij në Gaza.