Izraeli vret 31 palestinezë ndërsa bllokada në Gaza përshpejton urinë masive

Sulmet izraelite në Gaza kanë vrarë të paktën 31 persona, ndërkohë që bllokada mbi dy mujore e enklavës së rrethuar dhe të bombarduar ka shkaktuar mungesë të theksuar ushqimi, duke përshpejtuar urinë masive të popullsisë palestineze.

Sulmet izraelite të së mërkurës ishin të shpërndara në të gjithë Gazën. Trembëdhjetë persona u vranë në një sulm ndaj shkollës al-Karama në lagjen Tuffah në qytetin e Gazës.

Gjithashtu në veri, tre persona u vranë dhe disa të tjerë u plagosën nga një sulm mbi një shtëpi në Jabalia.

Tetë persona të tjerë u vranë – një baba me fëmijët dhe kushërinjtë e tij – përfshirë pesë që u vranë në një sulm mbi një shtëpi në qytetin Khan Younis në jug.

Tre persona të tjerë, përfshirë një fëmijë, u vranë pasi një tendë strehimi u godit në Deir el-Balah, në pjesën qendrore të Rripit të Gazës. Një burrë dhe gruaja e tij u vranë gjithashtu kur një shtëpi u godit në fshatin Bani Suheila, në lindje të Gazës.

Këto sulme vijnë në kohën kur Agjencia e Mbrojtjes Civile e Gazës tha të martën në mbrëmje se 31 persona ishin vrarë dhe dhjetëra të tjerë u plagosën pas një sulmi izraelit mbi një shkollë që strehonte të zhvendosur në kampin e refugjatëve Bureij në pjesën qendrore të enklavës.

Sulmet e përshkallëzuara përkeqësohen edhe më tej nga një bllokadë e Izraelit ndaj furnizimeve jetike që nga 2 marsi, duke lënë Gazën pa karburant dhe ushqime, përfshirë një mungesë gjithnjë e më të madhe të miellit. Organizatat humanitare kanë paralajmëruar se furnizimet ushqimore janë afër shterimit të plotë.

Një nënë e gjashtë fëmijëve, e strehuar në një objekt të UNRWA-s në Gaza, i tha agjencisë se nuk u kishte mbetur asnjë lloj ushqimi – përveç bukës.

“Shteti i Izraelit duhet ta heqë rrethimin,” shkroi UNRWA në platformën X të mërkurën.

“Duhet një përpjekje e përbashkët ndërkombëtare për të ndalur këtë katastrofë humanitare që po shkon drejt një niveli të paparë,” shtoi ajo.

Sektori shëndetësor në Gaza gjithashtu është nën presion të jashtëzakonshëm si nga sulmet, ashtu edhe nga bllokada – me të paktën 88 përqind të shtretërve spitalorë të zënë dhe mungesë të theksuar të materialeve mjekësore.

Bisedimet për armëpushim

Të mërkurën në mëngjes, Egjipti dhe Katari – që kanë ndërmjetësuar marrëveshjen e parë për armëpushim së bashku me Shtetet e Bashkuara – rikonfirmuan angazhimin e tyre për një marrëveshje që synon t’i japë fund “katastrofës së paprecedentë humanitare dhe të lehtësojë vuajtjet e civilëve përmes krijimit të kushteve për një armëpushim të plotë.”

“Të dy vendet theksojnë se përpjekjet për të futur përçarje midis kombeve vëllazërore – qoftë përmes dyshimeve, shtrembërimeve apo përshkallëzimit mediatik – nuk do të kenë sukses, dhe as nuk do t’i pengojnë ato të vazhdojnë përpjekjet e përbashkëta për t’i dhënë fund luftës dhe katastrofës humanitare që ajo ka shkaktuar,” thuhej në deklaratën e përbashkët, duke shtuar se po punojnë në bashkëpunim me SHBA për të arritur një marrëveshje.

Ndërkohë që Izraeli ka paralajmëruar një ofensivë të re dhe më të ashpër në Gaza nëse nuk nënshkruhet një marrëveshje për armëpushim, Hamasi ka thënë se bisedimet janë pa kuptim.

“Nuk ka kuptim të vazhdojmë me bisedime apo të shqyrtojmë propozime të reja për armëpushim për sa kohë që vazhdon lufta e urisë dhe e shfarosjes në Rripin e Gazës,” tha për agjencinë AFP zyrtari i Hamasit, Basem Naim, të martën. /Al Jazeera/